Charter Document - 99900009

Honorabilibus religiosis viris dominis suis precarissimis fratri Willelmo Hulles Dei gracia priori hospitalis Sancti Iohannis Ierusalem in Anglia suis que confratribus preceptoribus militibus presbiteris ac non presbiteris omnibus singulis que professionem et habitum eiusdem ordinis Sancti Iohannis Ierusalem in Anglia voventibus et habentibus presentibus et futuris frater Iohannes humilis et indignus prior domus Salutacionis Matris Dei ordinis Cartusien[] prope London[] et eiusdem loci conventus unanimis honorem condignum et orationum suffragium salutare Quamvis ex caritatis debito teneamur devote supplicacionis instancia divine pietatis aures pulsare iugiter pro universali hominum salute specialius cum hiis communicare tenemur et intendimus quecumque spiritualia bona nostra de quorum devocione et caritate erga nos et domum nostram predictam reddimur cerciores Ea propter exigentibus meritis magne caritatis vestre quam erga nos nuper experti sumus in aqueductu nostro conducendo per terram vestram aliis que pie devocionis beneficiis nobis diversimode exhibitis et ostensis vos vestros que successores per nomen prioris Sancti Iohannis et confratrum suorum omnium singulorum que premissorum in precibus capituli nostri inter fundatores et precipuos benefaccores nostros inscripsimus ibidem devote inter nos singulis diebus dominicis perpetuis futuris temporibus recommendandos Concedimus eciam vobis priori videlicet pro nunc existenti omnibus que prioribus et successoribus vestris futuris infra regnum Anglie ut cum obitus alicuius prioris ordinis vestri infra dictum regnum nobis fuerit intimatus quod nos et successores nostri pro ipsius anima ad gaudia celestia cicius perducenda officium mortuorum scilicet placebo cum dirige ac missam solempniter cum nota secundum morem ordinis nostri fideliter persolvemus concedentes insuper vobis scilicet prioribus preceptoribus militibus presbiteris ac non presbiteris omnibus et singulis suprascriptis et successoribus vestris fraternitatem nostram cum participacione plenaria omnium bonorum spiritualium que operante Domino per nos et successores nostros in predicta domo nostra imperpetuum fient videlicet in missis orationibus ieiuniis vigiliis abstinenciis disciplinis elemosinis ac exerciciis aliis quibuscumque spiritualibus Adicientes eciam de gracia speciali ut cum obitus alicuius vestrum videlicet preceptorum militum presbiterorum ac non presbiterorum aut successorum vestrorum nobis vel successoribus nostris fuerit intimatus in capitulo nostro anima ipsius devote recommendabitur fient que deinde pro remedio ipsius suffragia et misse que pro carissimis fratribus nostris et amicis defunctis inter nos fieri consueverunt In cuius rei testimonium sigillum nostrum commune presentibus est appensum Data in domo nostra predicta in festo assumpcionis Beate Marie Virginis domine nostre anno domini millesimo quatrocentesimo tricesimo