Charter Document - 99900007

Frater Philibertus de Nailhaco Dei gratia sacre domus hospitalis Sancti Iohannis Ierusalem magister humilis et pauperum Christi custos et nos conventus Rodi domus eiusdem religioso in Christo nobis carissimo fratri Waltero Grandon[] priori prioratus nostri in Anglia terra dicte domus salutem et sinceram in Domino caritatem Prout accepimus nuper nobilis vir Robertus Nowell[] proposuit et ordinauit fundare facere duas capellanias in Anglia terra pro salute anime sue et pro ipsarum capellaniarum fundacione et dotacione se convenit cum olim dicti prioratus priore fratre Iohanne de Radington[] predecessore vestro de certo precio sibi que de eodem satisfecit Qui prior morte preventus id quod promiserat se facturum non potuit adimplere Idcirco nos volentes saluti animarum ipsorum Roberti et prioris predictorum pro viribus providere et eorum pia vota seu voluntates suum effectum et optatum sortiri ac sperantes in Domino per vos pocius quam alios dictorum Roberti et prioris propositum adimpleri volumus que hortamur ut dictas duas capellanias fundari construi et dotari faciatis pro quarum fundacione construccione et dotacione ac expensis inde fiendis vobis tenore presencium invicem deliberate consilio de nostra certa sciencia baiuliam nostram Scocie et eciam mineram de carbonibus lapideis et fenham situatam iuxta villam Novi Castri super Tynam et cum aliis earum consimilibus cum omnibus et singulis earundem baiulis Scocie et minerie iuribus membris emolumentis et pertinenciis ad eas et earum qualiter spectantibus et pertinenciis ac spectare et pertinere debentibus quoquomodo habendas tenendas et possidendas quamdiu in humanis vitam duxeritis pure et libere absque aliqua responsione et quovis alio onere per vos exsoluendis vobis tenore presencium concedimus et donamus Ita tamen quod cicius fieri poterit huiusmodi capellanias duas construi faciatis et dotetis super quo vestram oneramus consienciam Quibus quippe fundacione construccione et dotacione factis ut prefertur habeatis ab heredibus dicti Roberti et aliorum quibus huiusmodi negocium tangit quintanciam quae vobis et nostre religioni sufficiat in futurum Mandamus universis et singulis dicte domus fratribus presentibus et futuris quacumque dignitate auctoritate vel officio fungentibus ne contra presentes venire presumant Quinymo eas iuxta earum seriem observare studeant inhibens vobis sub virtute sancte obediencie ne pre textu premissorum aliqua de bonis aut iuribus baiulis et minerie premissarum vendatis seu alienetis sine nostra speciali licencia et mandato decernentes irritum et inane si quid per vos vel alium incontrarium presumptum fuerit seu attemptatum In cuius rei testimonium bulla nostra communis plumbea presentibus est appensa Data Rodi die quarta mensis Novembris anno incarnacionis Domini millesimo quatrocentesimo quarto