Charter Document - 99900004

Universis sancte matris ecclesie filiis presentibus et futuris hanc cartam visuris vel audituris frater Philippus de Thame sancte domus hospitalis Sancti Iohannis Ierusalem prior humilis in Anglia et fratres sui eiusdem hospitalis salutem in domino sempiternam Sciatis nos de communi assensu tocius capituli et unanimi voluntate fratrum nostrorum in eodem capitulo congregatorum nemine reclamante seu contradicente obtentu innumerabilium beneficiorum que carissimus nobis in Christo Willelmus de Langeforde nobis et predecessoribus nostris hactenus impendit et precipue pro omnibus tenementis que fuerunt ipsius Willelmi cum pertinenciis in parochia Sancti Sepulcri extra Neugate London[] que super viam regiam ex omni parte abuttant de quibus idem Willelmus per cartam suam regio interveniente consensu nos et successores nostros imperpetuum feoffavit tenemur et obligati sumus per hanc cartam nostram eidem Willelmo ad inveniendum sumptibus nostris et successorum nostrorum quendam capellanum secularem officia divina singulis diebus imperpetuum pro salubri statu ipsius Willelmi dum vixerit et pro anima sua et animabus omnium fidelium defunctorum cum ab hac luce migraverat in ecclesia beati Iohannis Baptiste de Clerkenwelle iuxta London[] ad altare Sancti Iohannis Apostoli et Evangeliste iuxta summum altare ibidem celebraturum ac eciam diuturnas horas canonicas cum servicio mortuorum temporibus oportunis et stabit in octavo stallo in capite chori ecclesie predicte ex parte australi Quem quidem capellanum prior ecclesie nostre ibidem qui nunc est et qui pro tempore fuerit ad presentacionem seu denominacionem maioris sive custodis civitatis London[] qui est vel qui futurus erit ad predictam cantariam perpetuam dum tamen ipse capellanus ydoneus et honestus inveniatur recipiet et admittet ita quod decedente capellano huiusmodi vel voluntarie cedente seu propter suum notarium defectum per dictum priorem ecclesie predicte ab eadem cantaria privato vel amoto in forma iuris aut cum idem capellanus aliud beneficium ecclesiasticum cum cura vel sine cura sit assecutus ex tunc dicta cantaria pro vacante censeatur et habeatur et quod ex tunc nullum ius in ipsa cantaria habeat prefatus capellanus vel possideat omni cessante impedimento contradicionis seu litis cuiuscumque set quod prior ecclesie predicte qui pro tempore fuerit alium ydoneum et honestum capellanum secularem ad presentacionem seu denominacionem maioris seu custodis dicte civitatis qui tunc fuerit ad cantariam predictam admittet et ille capellanus prior ecclesie huiusmodi in licitis et canonicis mandatis canonicam faciet obedienciam concessimus eidem capellano qui pro tempore fuerit perpetuum victum ad mensam conventualem in domo nostra fontis clericorum et illam cameram que constructa est per dictum Willelmum in dormitorio nostro ibidem Ita quod dictus capellanus sit residens super cantaria et quod se non absentet ultra quindecim dies et hoc per licenciam prioris ecclesie nostre predicte necnon pro roba et necessariis duas marcas argenti singulis annis eidem capellano sic residenti de domo nostra fontis clericorum predicta per manus thesaurarii nostri ad ibidem ad festa Sancti Michaelis et pasche per equales porciones post decessum eiusdem persolvendas Et si contingat predictum capellanum qui pro tempore fuerit senio vel debilitate gravari seu detineri quo minus ad mensam valeat sedere supradictam quod tunc deserviatur eidem in esculentis et poculentis sicut uni capellano nostro in conventu predicto consuetum est ministrari percipiendas singulis annis predictas duas marcas argenti in forma prenotata Concessimus eidem Willelmo locum pro sepultura corporis sui quem preelegit inter summum altare et altare Sancti Iohannis Evangeliste in ecclesia nostra predicta ad tumilum construendum prout melius et honorificencius sibi videbitur expedire ad quam quidem cantariam perpetuam ut premittitur inveniendam et sustentandam obligamus nos et successores nostros et omnia tenementa predicta cum pertinenciis districcioni maioris civitatis predicte sive custodis eiusdem quicumque pro tempore fuerit ita quod si cantaria predicta aliquo tempore futuro quod absit in defectum nostrum seu successorum nostrorum per quindecim dies cessare contiget tunc bene liceat maiori seu custodi huiusmodi qui pro tempore fuerit nos et successores nostros per omnia bona et catalla in tenementis predictis inventa distringere et districciones huiusmodi detinere quousque eadem cantaria modo debito relevetur et sustentetur ac de cessacione huiusmodi competens fiat satisfaccio Et preterea predictus Willelmus dedit et pro se et heredibus suis concessit maiori civitatis London[] qui pro tempore fuerit vel custodibus eiusdem dimidiam marcam argenti ad recipiendum singulis annis imperpetuum de tenementis que idem Willelmus habet ex dono et feoffamento Iohannis de Oxenford[] iacentibus inter Westmehdefeld[] et Cockeslane in parochia Sancti Sepulcri in suburbio ad festa Sancti Michaelis et pasche ita quod predictus maior qui pro tempore fuerit sive custos supervideat singulis annis quod predicta cantaria perpetua in forma fiat prenominata Et si contingat predictum redditum aretro esse liceat maiori qui pro tempore fuerit sive custodi in predictis tenementis distringere et districciones huiusmodi abducere et detinere quousque de predicto redditu plene sibi fuerit satisfactum In cuius rei testimonium et perpetuum vigorem sigillum nostrum commune huic carte cirografate penes dictos Willelmum et maiorem remanenti apposuimus et sigilla predictorum Willelmi et maioris predicti predicte carte cirographate penes nos residenti sunt appensa cuius quidem carte pars penes nos in thesauraria nostra fontis clericorum et altera pars penes dictum Willelmum et tercia pars penes maiorem dicte civitatis qui pro tempore fuerit sive custodem eiusdem civitatis remanebunt Hiis testibus fratre Nicholao Halis priore ecclesie predicte fratribus Willelmo Brix Radulpho Basset Iohanne de Sindesbrok Roberto Cort Roberto de Comerdebye Iohanne Larther et omnibus aliis fratribus et secularibus in dicto capitulo tunc existentibus Datum in celebracione capituli nostri predicti apud fontem clericorum die martis proximo post festum Sancti Barnabe Apostoli anno Domini millesimo trecentesimo tricesimo sexto et anno regni Regis Edwardi tercii post conquestum decimo Et sciendum est quod istud scriptum cum sigillis remaneat penes camerarium in camera