Charter Document - 08210038

Universis presentis literas inspecturis Thomas permissione Divina Exoniensis Episcopus Salutem et pacem in Domino sempiternam Si celestis regni participes effici si perennis glorie Dyademate coronari concupiscimus et sitimus profecto summo desiderio vigilantique studio debemus diem extremum examinis in quo Deus qui cuncta creavit ex nichilo judicaturus est mundum et redditurus unicuique sive bonum sive malum secundum suorum exigenciam meritorum modis quos restat omnibus prout est possibile bonis operibus prevenire Ut igitur post depositam mortalitatis nostre materiam per exercitium bonorum operum que fecerimus eternorum intuitu dum sumus in via indulgenciam culparum quas cotidie contrahimus ac remissionem penarum quibus nos mundus demon et carnis opera reddunt obnoxios incessanter sanctorum meritis et oracionum suffragiis suffulti cum ipse Deus et Dominus omnium ad judicandum venerit facilius consequamur De premissis non immerito sollicite cogitantes Ecclesiam Sancti Uvely in Cornubia qui de nostro patronatu existit cum suis juribus et pertinentiis universis una cum jurisdiccione in spiritualibus ejusdem Ecclesie cum plebe sua consimili qualem Archidiaconi Exoniensis dyoecesis optinent in Ecclesiis et plebibus sibi subjectis dilectis in Christo filiis Decano et Capitulo nostro Exoniensi in usus proprios assignamus et per presentis attestacionem scripture appropriamus in forma inferius annotata perpetuo possidendam videlicet quod predicti Decanus et Capitulum suis sumptibus perpetuo inveniant duos presbiteros ydoneos et perpetuos quorum unus pro salubri statu nostro quoad vixerimus Missam de Sancto Spiritu cum horis canonicis nocturnis et diurnis Et postquam de presenti vita migraverimus pro anima nostra omniumque animabus predecessorum nostrorum progenitorum ac eciam benefactorum spiritualiumque nostrorum Missam pro Defunctis cum Placebo et Dirige ac Commendacione singulis diebus hora matutinane ad altare beate Marie Virginis in dicta Exoniensi Ecclesia alteram vero pro anima Magistri Thome de Bodeham quondam Archidiaconi Tottonye omniumque requie defunctorum idem officium pro defunctis et in forma predicta ad altare beati Gabrielis Archangeli cotidie celebrabunt Presbiter vero pro nobis intitulatus quinque marcas sterlingorum celebraturus autem pro anima dicti Archidiaconi quatuor marcas cum dimidia nomine stipendiorum per manus Senescallorum dictorum Decani et Capituli ad quatuor anni terminos principales percipient annuatim Si vero aliquis eorum decesserit vel alias propter culpam suam merito amotus fuerit alius presbiter ydoneus per nos dum vixerimus et post mortem nostram per ipsos Decanum et Capitulum in locum sic defuncti vel amoti absque mora qualibet subrogetur et nihilominus dicti Decanus et Capitulum omniaque eisdem presbiteris fuerint necessaria ad divinorum officia exequenda imprimis et pro anima celebris memorie Domine Alijanore quondam consortis Domini illustris Regis Anglie fiat solemnis Missa de Sancto Spiritu ad majus altare in Ecclesia Exoniensi per dictos Decanum et Capitulum eorumque successores Et post mortem nostram annis singulis eo die quo nos migrare contingat e seculo per singulas anni revoluciones solemnis anniversarius Dies pro anima nostra in perpetuum per eosdem ita quod quilibet canonicus tam in ipsa solemni Missa celebranda de Sancto Spiritu nobis viventibus quam post mortem nostram die anniversarii nostri predicti dum hujusmodi sollempnia agantur corporaliter presens in choro duos solidos quilibet vicarius duodecim denarios quilibet clericus de secunda forma sex denarios quilibet puer chori duos denarios clericus de scaccario cum ministris suis duos solidos Custores pro classico duodecim denarios et quilibet presbiter de civitate et suburbio Exonie tunc presens unum denarium per manus Senescallorum dictorum Decani et Capituli dum ipsa ministeria divina celebrantur in choro juxta antiquam ipsius Ecclesie consuetudinem et fratres minores Exonie duos solidos ad Pytanciam de bonis ipsius Ecclesie perpetuo percipiant ipso die Proviso tamen quod si aliquis in dicta Exoniensi Ecclesia duplici aut pluri officio fungatur non officii set persone duntaxat in dicta distribucione racio habeatur Et nihilominus ipsi Decanus et Capitulum invenient quatuor cereos circa sarcophagum in quo quiescimus dum Placebo et Dirige celebrabitur et per totum diem sequentem die obitus nostri continue ardentes cum sufficienti thure quod eodem die ad divinum ministerium requiretur Volumus eciam et ordinamus ut totum residuum proventuum dicte Ecclesie Sancti Uvely inter Canonicos quos predicte solemnitati personaliter interesse contigerit equaliter dividatur et nequaquam in usus alios convertatur salva competenti vicaria in dicta Ecclesia Sancti Uvely quam in toto alti legio et toto sanctuario consistere volumus sicut consistere consuevit ab antiquo per nos et successores nostros honeste persone que omnia onera ordinaria debita et consueta sustinebit in quibus reparacionem cancelli includi intelligimus perpetuis temporibus conferenda Statuimus etiam et ordinamus quod quilibet Decanus et Canonicus Exoniensis in sui creatione hanc nostram ordinationem una cum aliis antiquis et approbatis Ecclesie Exoniensis consuetudinibus juret per omnia observare In cujus rei testimonium presentibus fiteris sigillum nostrum duximus apponendum Actum et datum Exonie Idibus Octobris anno Domini millesimo ducentesimo nonagesimo septimo et consecrationis nostre sexto