Charter Document - 08210037

Omnibus Christi fidelibus ad quorum noticiam presentes litere pervenerint Radulphus filius Ricardi Miles et Rogerus le Rous Rector Ecclesie de Nordhull Salutem in Dominum sempiternam Noverit universitas vestra quod anno Domini millesimo ducentesimo octogesimo tercio ita convenerit inter nos quod ego dictus Radulphus vendidi et tradidi dicto Rogero le Rous unam acram terre de Dominico meo de Wydecumb cum advocacione Ecclesie Sancti Pancratii de Wydecumb et Capelle Sancti Leonardi de Spichwyke predicte matrici ecclesie adjacentis pro octoginta marcis argenti ad usum meum proprium recipiendum et viginti marcis in auxilium filie mee maritande convertendis De qua quidem pecunia dictus Rogerus triginta et quinque marcas mihi solvit pre manibus Ego vero prefatus Rogerus totum residuum predictarum octoginta et viginti marcarum videlicet sexaginta et quinque marcas teneor et bona fide promitto solvere supradicto Domino Radulpho sive ejusdem certis assignatis terminis subscriptis sine ulteriori dilacione Scilicet in Festo Sancti Martini anno supradicto vel ejus octavis quindecim marcas et in Festis Purificacionis beate Marie Pentecostes et Sancti Michaelis proximis sequentibus triginta marcas equis porcionibus Et infra finem anni proximo subsequentis illas predictas viginti marcas predicto Domino Radulpho ad filiam suam maritandam promissas et debitas Ad quam quidem pecuniam dictis terminis fideliter solvendam obligo me et omnia bona mea mobilia et immobilia habita et habenda ubicumque in vita vel in morte inventa dicto dommo Radulpho et ejus assignatis subjiciens in premissis me res redditus et omnes possessiones meas cohercioni officialis Domini Exoniensis Episcopi qui pro tempore fuerit volens et concedens quod quociens in solucione predicta suis terminis facienda defecero quod idem officialis me per suspencionis excommunicacionis et interdicti sentencias appellacione remota strepituque judiciali omnino cessante ad hoc compellat Volo eciam et concedo quod si dicta pecunia nondum persoluta in fata decessero nulla bonorum meorum utpote ad predictam solucionem specialiter obligatorum fiat administracio donec prefato Domino Radulpho vel suis certis assignatis fuerit in hac parte satisfactum Et ego siquidem prenominatus Radulphus bona fide et sacramento corporaliter prestito pro me et heredibus meis et assignatis promitto quod predictam acram terre cum advocacione antedicta et aliis pertinentiis suis dicto Rogero et quibuscumque dictam terram et advocacionem appropriare sive assignare voluerit warantizatio inperpetuum Ita quod si ipse heredes sui vel assignati vel eciam hii quibus dicta advocacio impostorum fuerit appropriata per me vel heredes meos vel eciam ad quorumcunque manus dictum manerium meum de Wydecumb processu temporis pervenerit impeditus seu impediti fuerit vel fuerint quominus de Ecclesia predicta cum Capella sive ad eas cum vacaverint presentando sive ipsas in proprios usus retinendo ordinare et ad voluntatem suam disponere possint dabimus eidem Rogero sive illis qui predicto modo fuerint per nos vel hujusmodi successores nostros impediti ducentas marcas argenti tam de dicto manerio meo de Wydecumb quam de aliis terris meis ubicumque in Devonia existentibus per vicecomitem Devonie qui pro tempore fuerit cujus districtioni omnes dictas terras meas in hac parte subjicio levandas et prefato Rogero sive cuicumque dictum impedimentum passo vel passis solvendas Et si contingat dictum vicecomitem ea occasione aliquam districtionem in dictis terris meis facere quociens eam fecerit tociens de bonis meis vel dictas terras tenencium habeat quadraginta solidos pro labore suo in proprios usus convertendos Et ad predictas ducentas marcas in casu memorato solvendas omnes predictas terras meas tenore presentis scripti obligo et assigno Et ut fides in omnibus premissis utrobique observetur tam ego prefatus Radulphus quam ego Rogerus de predicta convencione fideliter tenenda affidavimus et ad majorem securitatem huic presenti scripto indentato et inter nos bipartito et deciso sigilla nostra alternatim apposuimus Hiis testibus Dominis Thome Pyn vicecomite Devonie Willielmo de Byckebury Rogero de Prediaus militibus Randulpho de Dodscumb Egidio de Fyssacre Johanne de Bouyle Ricardo de Aure Thome Peytewyn et aliis Datum Exonie die Sabbati proxima ante Festum Nativitatis beate Marie anno regni Regis Edwardi undecimo