Charter Document - 08210036

Universis sancte matris Ecclesie filiis presencium litterarum seriem inspecturis Petrus miseracione Divina Exoniensis Episcopus Salutem in Domino sempiternam Nobis Ecclesie nostre Exoniensis quam utpote sponsam nostram debito caritatis amplexu perstringimus statum retractantibus velut inconveniens occurrit quod inter omnes Cathedrales Ecclesias vicinas moribus et honestate dono Dei ditissima omnibus sit ipsa pauperior rerum substantialium facultate Ejus igitur possessionum exilitatem considerantes et memoriam pie recordacionis Magistri Rogeri de Toriz quondam Decani Ecclesie memorate recolentes ad dilecti filii nostri Magistri Rogeri le Rus et coexecutorum suorum testamenti dicti defuncti importunam instanciam et supplicacionem assiduam Ecclesiam de Wydecumb nostre dioecesis Decano et Capitulo Ecclesie nostre supradicte veris ejusdem patronis cum Capella de Spykewyk et omnibus aliis pertinenciis suis concedimus confirmamus et tenore presencium appropriamus Ita quod cedente vel decedente Johanne filio Ricardi nunc Rectore dicte Ecclesie de Wydecumb liceat prefatis Decano et Capitulo possessionem ejusdem cum pertinenciis auctoritate presencium irrequisito nostro vel successorum consensu ingredi et eam sibi et successoribus suis habere et pleno jure tenere et possidere inperpetuum Salva vicariis ibidem pro tempore existentibus per nos et successores nostros ad presentacionem supradictorum Decani et Capituli instituendis quibus ipsius Ecclesie cura animarum incumbet vicaria sua per nos vel successores nostros taxanda Salvis eciam decem marcis sterlingorum singulis annis inperpetuum de Scaccario eorundem solvendis et per subscriptas particulas in supradicta Ecclesia Exoniensi annuatim distribuendis videlicet cuidam idoneo et honesto capellano per dictos Decanum et Capitulum deputando et non sine justa et rationabili causa dum vixerit amovendo pro anima dicti defuncti ad altare Sanctorum Ricardi et Radegundis in eadem Ecclesia nostra ubi corpus dicti defuncti jacet humatum successive celebranti nomine stipendii sex marcis cui nihilominus capellano pro tempore existenti dicti Decanus et Capitulum in libris vestimentis et aliis ad celebrandum necessariis hiis que ad presens in predicto altari habentur vetustate deficientibus de scaccario suo providebunt et ea invenient Ad obitum vero ipsius defuncti singulis annis faciendum singulos triginta solidos ita scilicet quod quibus canonicus ipsius Ecclesie qui ipso die obitus presens fuerit in Missa pro prefato defuncto celebranda duodecim denarios inde percipiat quilibet vicarius sex denarios quilibet clericus de secunda forma duos denarios et quilibet puer de choro unum denarium absentibus autem cujuscunque gradus existant nichil omnino solvatur Et si quid de predictis triginta solidis ultra hoc remanserit inter capellanos et clericos chori et civitatis per dispositionem senescallorum dicti capituli fideliter distribuatur Ad obitum eciam prenominati Magistri Rogeri le Rus postquam de medio sublatus fuerit die anniversarii sui in eadem Ecclesia nostra Exoniensi in forma communi celebrandum singulis annis singulos decem solidos Et ad Festum de Corpore et Sanguine Jesu Christi per prefatum defunctum in dicta Ecclesia primitus introductum in cera et cotidiana distribucione ac aliis circumstanciis instar Festi Assumpcionis beate Marie Virginis duplicanda unam marcam Quicquid autem de proventibus dicte Ecclesie cum pertinenciis residuum fuerit deductis vicaria et decem marcis predictis et supradictis capellano ad celebrandum necessariis in augmentum cotidianarum distribucionum canonicorum ejusdem capituli nostri qui in majore refeccione diei in civitate presente fuerint volumus et statuimus converti In quorum omnium testimonium et perpetuam firmitatem sigillum nostrum una cum sigillo predicti Capituli nostri presentibus est appensum Datum Exonie in crastino Purificacionis beate Marie anno Domini MCC octogesimo tercio et consecracionis nostre anno quarto