Charter Document - 08210022
| Charter Number: | 08210022 |
|---|---|
| Cartulary Title: | Lives of the Bishops of Exeter |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1300 |
| Date type: | Internal, A.D., Calendar |
| Resource Link(s): |
|
Charter:
Universis ad quos presens scriptum pervenerit Andreas Decanus Ecclesie Sancti Petri Exoniensis et ejusdem loci Capitulum eternam in Domino Salutem Cum venerabilis Pater Dominus Petrus bone memorie quondam Episcopus noster multa bona nobis et successoribus nostris fecerit et contulerit tam inter vivos quam in ultima voluntate Ecclesias plures absque sui Episcopii diminucione quacunque Ecclesie nostre annectendo seu appropriando et eandem Ecclesiam quoad novam ejus fabricam ampliando et pro magna sui parte sumptu proprio consummando Nos volentes eidem pro modulo nostro gratitudinis vicem rependere quamquam tantis beneficiis non condignam concedimus et ordinamus quod die anniversarii sui in Ecclesia nostra singulis annis perpetuo solempniter celebrandi viginti solidos sterlingorum de bonis nostris communibus de Scaccario nostro per manus senescallorum nostrorum qui pro tempore fuerint ad hoc liberandi in choro sicut a tempore obitus sui hactenus observatum est distribuantur Volumus insuper et concedimus ac eciam ordinamus quod vicarii Ecclesie nostre quibus celebrandi missam de Beata Virgine onus incumbit pro anima dicti Patris cujus corpus ante altare Beate Marie humatum quiescit in singulis missis celebrandis de Beata Maria Virgine in eodem altari exceptis diebus festivis duplicibus unam collectam hanc scilicet Deus qui inter apostolicos sacerdotes cum secreta et post comunione collecte ejusdem perpetuo dicere teneantur et nomina ipsius in memento quod in canone misse dicitur pro mortuis primum et precipuum memorentur et ut hoc onus quanquam leve libentius agnoscant et devocius impleant volumus concedimus et ordinamus quod sex decem solidos sterlingorum de bonis nostris communibus de Scaccario nostro per manus senescallorum nostrorum qui pro tempore fuerint ad quatuor anni terminos in Ecclesia nostra consuetos eis solvendos et inter eos equis porcionibus dividendos perpetuo percipiant annuatim In cujus rei testimonium sigilla nostra cum sigillis trium vicariorum nomine suo et nomine ceterorum omnium presenti scripto indentato sunt appensa Datum in Capitulo nostro Exonie VIIJ Idibus Februarii Anno Domini MCC nonogesimo nono