Charter Document - 08140186
| Charter Number: | 08140186 |
|---|---|
| Cartulary Title: | Charters and records among the archives of the ancient abbey of Cluni, from 1077 to 1534 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1229 |
| Date type: | Internal, Calendar, Papal |
| Resource Link(s): |
|
Charter:
Gregorius episcopus servus servorum Dei dilecto filio abbati Cluniacensi salutem et apostolicam benedictionem Sacrosancta Ecclesia quam decet quidquid est reprehensibile devitare sustinere alicujus compositionis pretextu non decet ut in prejudicium veritatis ecclesiastica laici ultra sibi vindicent in ecclesiis quam jura permittunt cum sic tradi compositionis compendium nunquam dispendium pateretur In nostra sane proposuisti presentia constitutus quod super ordinatione prioris monasterii Sancti Pancratii ad Cluniacensem ecclesiam pertinentis cum nobili viro comite de Varenna patrono ipsius quidam predecessor tuus de consensu capituli sui ut asseritur a triginta annis infra compositionem quandam iniit juri contrariam et ecclesie ipsi damnosam videlicet ut in optione sit ipsius comitis assumere ad prioratum dicti monasterii Cluniacensi et de Caritate prioribus duntaxat exceptis unum de duobus melioribus totius Cluniacensis ordinis quos abbas duxerit nominandos Cujus compositionis pretextu monachi ejusdem monasterii de priore illud ordinari ab abbate Cluniacensi minime patiuntur nec alium nisi qui ab eodem comite assumitur modo predicto volunt assumere in priorem Propter quod priori et monachis prioratus predicti contra Cluniacensem ecclesiam datur rebellionis materia cum videant quasi per comitem de priore suum monasterium ordinari Suppliciter ergo a nobis et humiliter postulasti ut quia talis compositio de jure tenere non debet cum secundum statuta canonica patroni consensus electioni facienda in collegiatis ecclesiis nequaquam requirendus existat ordinandi prioratum eundem non obstante compositione predicta tibi deberemus concedere facultatem Attendentes itaque hoc esse perniciosum exemplo et redundare in dispendium ecclesiastice libertatis nos super hoc providere volentes et amputare materiam monachis prioratus ejusdem contra Cluniacensem ecclesiam rebellionis calcaneum erigendi tuis supplicationibus inclinati devotioni tue presentium auctoritate concedimus ut dictum prioratum libere possis non obstante compositione ipsa sicut alios prioratus tibi subditos ordinare denuntianda ordinatione facta patrono ut suum si voluerit honestum impertiatur assensum Nulli ergo omnino hominum liceat hanc paginam nostre concessionis infringere vel ei ausu temerario contraire Si quis autem hoc attemptare presumpserit indignationem Omnipotentis Dei et beatorum Petri et Pauli apostolorum ejus se noverit incursurum Datum Perusii viii kalendas novembris pontificatus nostri anno secundo