Charter Document - 08100007
| Charter Number: | 08100007 |
|---|---|
| Cartulary Title: | Annales Prioratus de Dunstaplia [Dunstaple] |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1234 |
| Date type: | Assigned |
| Resource Link(s): |
|
Charter:
Henricus rex Anglie vicecomiti salutem Quia audivimus quod tu et ballivi tui et etiam ballivi aliorum qui hundreda habent in comitatu tuo non intelligitis qualiter hundreda et wapentakia teneri debeant in comitatu tuo postquam concessimus hominibus de regno nostro libertates contentas in cartis nostris quas inde fecimus dum fuimus infra etatem nos eandem cartam nuper fecimus legi in presentia domini Cantuariensis et majoris et sanioris partis omnium episcoporum comitum [et] baronum totius regni nostri ut coram eis et per nos exponeretur hec clausula contenta in carta nostra de libertatibus videlicet quod nullus vicecomes vel ballivus faciat turnum suum per hundredum nisi bis per annum et non nisi in loco debito et consueto videlicet semel post Pascha et iterum post festum Sancti Michaelis sine occasione Ita scilicet quod quilibet habeat libertates suas quas habuit et habere consuevit tempore H[enrici] regis avi nostri vel quas postea perquisivit Unde a multis ibi dictum fuit et testatum quod tempore H[enrici] regis avi nostri tam hundreda et wapenthakia quam curia magnatum Anglie solebant teneri de quintana in quintanam Et licet multum placeret nobis communi utilitati totius regni nostri et indemnitati pauperum providere tamen quia illi duo turni plene non sufficiunt ad pacem nostram conservandam et ad excessus tam divitibus quam pauperibus illatos corrigendos que ad hundreda pertinent de communi consilio predicti archiepiscopi Cantuariensis et omnium predictorum episcoporum comitum baronum et aliorum ita provisum est quod inter predictos duos turnos teneantur hundreda wapentakia et etiam curie magnatum de tribus septimanis in tres septimanas ubi prius teneri solent de quintana in quintanam Ita tamen quod ad illa hundreda wapenthakia et curias non fiat generalis sum monitio sicut ad turnos predictos Sed ad hundreda illa et wapenthakia et curias conveniant conquerentes et adversarii sui et alii qui sectas debent per quos teneantur placita et fiant judicia Nisi ita sit quod ad hundreda illa et wapenthakia fiat inquisitio de placitis corona sicut de morte hominis thesauro invento et hujusmodi ad que inquirenda conveniant cum predictis sectaris quatuor villata proxime scilicet omnes de illis villis qui necessarii fuerint ad inquisitiones illas faciendas Et ideo tibi precipimus quod predicta hundreda wapenthakia et curias tam nostra quam aliorum teneri facias de cetero secundum quod predictum est de tribus septimanis in tres septimanas exceptis predictis duobus turnis qui de cetero teneantur secundum quod prius solebant Teste []