Charter Document - 08070017

Sanctissimo patri I[nnocentio] Dei gratia summo Pontifici sancte civitatis Hierusalem patriarcha salutem [] Egressa do finibus Orientis crudelitas bestialis in Hierosolymitanam provinciam est conversa que etsi diversis temporibus a circumstantibus Saracenis multipliciter vexaretur his tamen diebus sopitis vicinis hostibus in statu pacifico utcumque respirabat Excitaverunt autem in ejus excidium peccata populi Christiani gentem incognitam et ultorem gladium de longinquo deseviens rabies siquidem Tartarorum totam Orientalem plagam flagello multiplici et terrore concussit Qui dum persequentes equaliter universos nullam distantiam facerent inter incredulos vel fideles predam ab extremis finibus fugaverunt Christianum populum predaturam Ipsi etenim Tartari universam Persidem destruentes in nequiores se spiritus prelium converterunt venantes crudelissimos hominum Corasminos quos quasi dracones ex cavernis eductos de propriis finibus expulerunt Qui cum certum habitaculum non habentes non possent ab aliquibus Saracenis propter eorum nequitias receptaculum adipisci solus Soldanus Babylonie Christi fidei persecutor eisdem Corasminis hospitium in terra propria denegans obtulit alienum eosdem incredulos ad inhabitandam terram promissionis advocans et incitans quam in se credentibus Altissimus promiserat et donavit Illi vero de Soldani presidio confidentes in hereditatem Domini quam dictus Soldanus prout dicitur illis contulit adverterunt cum uxoribus et familiis et multis milibus equitum et armatorum Quorum sic extitit repentinus adventus quod nec a nobis nec a vicinis partibus potuit previderi ut precognita jacula vitarentur usque dum Hierosolymitanam provinciam per partes Saphet et Tiberiadis intraverunt Et cum sollicitudinem apposuerimus multipliciter et laborem qualiter Terre Sancte pax et tranquillitas pristina redderetur novis hostibus perturbata nec ad eorum expulsionem Christianorum vires sufficerent prefati Corasmini totam terram a Turone militum quod est prope Jerusalem usque Gazaram occupaverunt Ex communi itaque consilio et unanimi voluntate una cum prelatis magistris religiosarum domorum et nobilium regni Soldanos Damasci et Chamele qui erant cum Christianis pacis federe colligati et contra Corasminos inimicitias habent speciales reputantes etiam se per illorum adventum fore confusos et terram quam habebant Christiani juxta formam treugarum tenebantur defendere contra omnes alios Saracenos ad Christianorum subsidium duximus convocandos Qui etsi firmiter promiserint et juraverint se nobis auxilium prestaturos illorum tamen succursu valde dilato et Christianis in respectu paucissimis solis contra illos perfidos dubitantibus dimicare dicti Corasmini civitatem Jerusalem propugnaculis penitus immunitam sepius invadebant At Christiani qui erant in illa predictorum sevitiam metuentes ad veniendum in terram Christianorum ultra sex milia hominum congregati paucis in civitate relictis confisi de treugis quas cum Soldano de Cracco et rusticis de montanis habebant iter cum omnibus familiis suis et rebus per ipsa montana ceperunt Egressi vero rustici partim illos gladio occiderunt partim miserabiliter captivaverunt exponentes venales Chri tianos utriusque sexus et etiam moniales Saracenis ex quibus cum aliqui evadentes [in] Ramensem planitiem descendissent Corasmini irruentes in eos trucidaverunt eosdem ita quod ex tanto populo vix evasere trecenti semivivi relicti Tandem prenominati perfidissimi Jerosolymitanam civitatem intrantes quasi populo destitutam Christianos qui ibi remanserant seque infra ecclesiam Dominici sepulcri receptave erunt ante ipsum sepulcrum crudeliter universos evisceras erunt et universos decapitantes qui in altaribus celebrabant dicebant ad invicem Hic effundamus sanguinem populi Christiani ubi libaverunt vinum ad honorem Dei sui quem hic dicunt fuisse suspensum Insuper cum dolore dicimus et cum suspiriis intimamus quod in sepulcrum resurrectionis Dominice manus sacrilegas extendentes illud multipliciter deturbaverunt tabulatum marmoreum quod circumcirca erat positum funditus evertentes et montem Calvarie ubi Christus erat crucifixus et totam ecclesiam ultra quam dici valeat in omni turpitudine quantum in se fuerat sedaverunt Columnas vero sculptas que ante sepulcrum Domini erant ad decorem posite sustulerunt in Christianorum contumeliam ad sepulcrum sceleratissimi Machumeti in signum victorie transmittentes et violatis sepulturis felicium regum in eadem ecclesia collocatis eorundem ossa in Christianitatis injuriam disperserunt Montem insuper Syon locum reverentissimum sine reverentia profanantes templum Domini ecclesiam vallis Josaphat ubi beatissime Virginis est sepulcrum ecclesiam Bedlemitanam et locum nativitatis Domini indignis relatu enormitatibus polluerunt omnium Saracenorum nequitiam excedentes qui licet terram Christianorum sepius occupassent loca tamen sancta utcumque in veneratione servabant Verum cum his omnibus non contenti ad captionem et destructionem totius terre sepe dicti Corasmini multipliciter aspirarent nec possent mala ulterius tolerari que cujuslibet Catholice fidei celatoris animum merito poterant in merorem et amaritudinem irritasse tot injuriis et enormitatibus lacessiti populus Christianus ad resistendum eisdem predictorum Soldanorum potentiam una cum Christianorum viribus de communi consilio duximus congregandam sicut olim per venerabilem patrem dominum episcopum Tyberiadensem et nostras literas vestre paternitati meminimus intimasse Cum quibus omnibus contra illos quarto die mensis Octobris exercitus Christianus de maritima Accone movere incepit per Cesaream et alia loca maritima procedendo Ipsi vero Corasmini nostrum presentientes adventum et per diversa loca retro cedentes demum [ante] Gazaram castra fixerunt expectantes succursum quem Soldanus Babylonie caput sacrilegii erat eisdem transmissurus Recepta vero ab eodem Soldano maxima multitudine armatorum nobisque cum exercitu Christiano et prefatorum Soldanorum appropinquantibus contra illos eos in vigilia Sancti Luce ante Gazaram invenimus cum multitudine infinita habentes acies ordinatas ad bellum nostris per duces exercitus acies disponentibus qualiter progrederentur ad bellum Nobis autem auctoritate omnipotentis Dei et sedis Apostolice remissionem indulgentibus de penitentiis peccatorum summa contritio et effusio lacrymarum singulis celitus est infusa ut mortem corporis pro nihilo reputantes et sperantes premium sempiternum mori pro Christo vivere reputarent unde etsi forte corporalis calamitas peccatis nostris exigentibus supervenit credendum est Altissimum qui est scrutator cordium et cognitor secretorum animarum lucrum potius quam corporum acceptasse Post hec autem concurrentibus nostris una cum illis Saraceni qui nobiscum aderant ab hostibus superati universaliter se converterunt in fugam captis pluribus ex illis et interfectis et sic Christiani soli in prelium remanserunt Cumque in eos Corasmini cum Babylonicis in simul irruissent eis invicem dimicantibus Christiani tanquam athlete Dei et fidei Catholica defensores quos eadem fides et passio vere fecit esse germanos fortissime restiterunt Et cum essent respectu inimicorum paucissimi pro dolor succubuerunt in bello hostibus preliorum adversitate cedente[s] ita quod de conventibus domus militia Templi Hospitalis Sancti Johannis et Sancte Maria Teutonicorum tantummodo xxxvi Templarii xxv Hospitalarii et tres fratres Theutonici evaserunt aliis peremptis et captis Optimates autem terre et milites pro majori parte capti et interfecti fuerunt preter stragem balistariorum et peditum infinitam De archiepiscopo vero Tyrensi episcopo Sancti Georgii abbate Sancte Marie de Josapath magistro Templi et preceptore Sancte Marie Theutonicorum et quam pluribus aliis religiosis et clericis cum non apparuerint plurimum dubitatur utrum in illo bello obierint vel sint in captivitate detenti nec de ipsis adhuc scire potuimus veritatem Magister vero Hospitalis et comes Walterus de Brena heu cum multis aliis capti in Babyloniam sunt deducti Nos vero in quos nostris peccatis exigentibus omnis calamitas supervenit indigni a Domino martyrio reputati evasimus semivivi apud Ascalonem cum nobilibus viris constabulario Acconensi Philippo de Monte Forti militibus et peditibus qui evaserunt de bello receptaculum capientes et exinde Joppen venimus reperientes locum ipsum immunitum maxime cum comes Galterus captus esset pro cujus munitione per duos dies traximus ibi moram dimittentes ad defensionem ejusdem stipendiarios prout possibilitas ministrabat Et licet nobis qui cuncta perdidimus in bello predicto nulla sit consolatio in tot adversitatibus et erumnis illud tamen quod ad presens potuimus facientes illustribus regi Cypri et principi Antiochie nostras literas et nuncios misimus speciales eos cum omni devotione rogando et etiam exhortando ut in tante necessitatis articulo ad terre defensionem mittere debeant milites et armatos sed quid sint super hoc facturi nescimus Demum apud Accone civitatem reversi et morantes in illa ipsam civitatem cum tota ultra marina provincia invenimus plenam doloribus ululatibus et afflictionibus infinitis Nec erat domus vel anima que mortuum suum proprium non ploraret Cum enim sit dolor de preteritis timor imminet precipuus de futuris cum enim tota terra privata suffragio defensorum sit sufficientia destituta superstites etiam sint numero pauci in exanimationem deducti restat ut Crucis hostibus ad votum desiderata succedant Qui in maximam audaciam prodeuntes castrametati sunt in planitie Acconie prope civitatem per miliaria duo et per totam terram libere nullo resistente discurrunt occupantes eandem et inter se quasi propriam dividentes per villas et casalia Christianorum legatos et bajulos preficiunt suscipientes a rusticis redditus et tributa que Christianis prestare solebant qui etiam Christianis hostes et rebelles effecti prefatis Corasminis universaliter adheserunt Ita quod omnes Jerosolymitana provincia Christiani aliam terram non habent ad presens nisi munitiones quas cum maxima difficultate defendunt et totius terre perditio imminet et ruina nisi virtus Altissimi et sedes Apostolica subsidii manum duxerit apponendum ut Terre Sancte in proximo passagio mensis Martii succurratur Dicitur etiam quod Babylonici apud Gazaram existentes in multitudine infinita venturi sunt ad partes Acconia ut simul cum Corasminis obsideant civitatem Ha Deus nunquid Rachel filios non plorabit Aut ipsa poterit oblivisci Vel matris piissime animam filiorum excidium non affliget Nunquid etiam sanguis innocens filiorum qui clamant a terra cor Patris ad misericordiam non compungat Ut successor Altissimi qui animam suam dedit pro ovibus a quo sibi in beato Petro oves Domini sunt commisse lupis gregem laniantibus non resistat Avertat hoc Dominus Deus Jesus Christus a vicario suo ut terram quam ipse proprio sanguine consecravit et peregrinorum filii non sine multa sanguinis effusione edificaverant in qua etiam sedes Apostolica una cum mundi principibus frequenter labores dolores et expensas subiit in immensum pastor eximius suis diebus deserat in ruinam Itaque cum suspiriis et lacrymis sanctitatem Apostolicam imploramus humiliter deprecantes in Christo quatenus considerantes subversionem populi Christiani cui similis in partibus transmarinis a memoria hominum est remota attendentes etiam graviora que in posterum poterunt evenire quibus est velociter obviandum pietate vobis innata acceleratum presidium et salutare consilium apponatis Et quia ceteras necessitates et universalem statum terre longum esset vestre beatitudini per literas explicare mittimus ad pedes vestra dominationis religiosos viros fratres J et R ordinis fratrum Minorum qui seriem veritatis fideliter et plenaria refcrent Apostolica sanctitati Ad illustres reges Francis et Anglis cum vestris literis si de vestre voluntatis beneplacito fuerit processuri pietatis vestre clementiam humiliter implorantes ut vestre dignationi placeat predictos fratres qui se pro Ecclesia Dei magnis exposuere periculis tempore hyemali navigando solita benignitate liberaliter recipere et audire Datum apud Acconiam tali die anno Domini MCCXLIV