Charter Document - 08070014

Gregorius episcopus servus servorum dei venerabilibus fratribus suffraganeis Cantuariensis ecclesie salutem et apostolicam benedictionem Egressus a facie Dei Sathan ad fortia manum mittens de sua calliditate confisus vitiorum vinculis illaqueare molitur electos in sortem Dominicam evocatos majores ibi parans ille tortuosus insidiator insidias ubi graviores prospexerit corruptelas Sane cum frequenter ad nostram audientiam pervenisset quod monasteria Cantuariensis provincie in spiritualibus enormiter et in temporalibus graviter per malitiam et injuriam in eisdem habitantium sunt collapsa nos culpas eorum nolentes ulterius sub dissimulatione transire ne si eas dimiserimus incorrectas ipsas nostras efficere videamur monasteriis illis que ad Romanam ecclesiam nullo noscuntur medio pertinere in eadem provincia constitutis visitatores reformatores et correctores tam in capite quam in membris deputavimus speciales plenaria sibi potestate concessa ut visitatores eadem monasteria vice nostra corrigant et reforment que in ipsis correctionis et reformationis officio noverint indigere correctionibus aliis in provinciali capitulo rite factis in suo robore nihilominus duraturis Licet autem nobis in plenitudine potestatis assumptis cura cunctorum immineat generalis quia tamen vos qui vocati estis in partem sollicitudinis super grege vobis commisso specialiter decet esse sollicitos et attentos ne ovis morbida pereat a pastoris negligentia vel neglecta universitatem vestram monemus et hortamur attente in virtute obedientie districte vobis precipiendo mandantes quatenus singuli vestrum tam in civitatibus quam in dioecesibus vestris per vos ipsos aut per viros religiosos qui experimento rerum in hujusmodi visitationibus sunt instructi loca monachorum monialium et canonicorum regularium necnon secularium clericorum vobis subjecta visitare curetis tam auctoritate nostra quam vestra generaliter universa reformantes et corrigentes in capite ac membris omni gratia et timore postpositis in eisdem que reformanda noveritis et etiam corrigenda salvis his que circa religiosos in provinciali capitulo provide sunt statuta juxta constitutionem generalis concilii contradictores per censuram ecclesiasticam appellatione postposita compescendo preceptum nostrum taliter impleturi quod Dominus ultionum in illo tremendo judicio quo unicuique secundum opera sua reddet de vestris manibus non requirat sanguinem eorundem et nos ad id limam correctionis Apostolice apponere non cogamur Datum Spoleti v idus Junii pontificatus nostri anno sexto