Charter Document - 08070013

Gregorius episcopus servus servorum Dei venerabilibus fratribus archiepiscopo Eboraci episcopis et dilectis filiis et aliis ecclesiarum prelatis Anglie constitutis salutem et apostolicam benedictionem Dulcis amaritudinis et amare dulcedinis historiam recensentes ante oculos mentis vestre creature scripture glorie ac nature speculum inclyti speculatoris proponimus ut in his que in Anglie bulle nostre literis clericis ac cursoribus facta sunt his diebus dormientes ac vigiles ab invicem advertentes quasi sub quodam compendio causam suam in sinu suo recolligente quolibet diversa diversis inferentes stipendia meritorum dormientes correctionis aculeis excitatis et vigiles ad noctis vigilias studiosius excubantes speculatori qui astat desuper presentemus Attendite igitur fratres et filii si in conculcatione numismatis Petri et Pauli apostolorum imaginem et nomen Jesu Christi vicarii profitentis debita Creatori reverentia exhibetur si in laceratione literarum nostrarum scripture mandata servantur si in captione obsessione redemptione spoliatione clericorum privilegiati cleri gloriosa libertas infringitur si in illata in cursoribus nostris injuria uno in frusta conciso et altero semivivo relicto illa communis securitas que non solum in Christianismo sed etiam in paganismo quasi naturaliter debetur omnibus observatur Sane bulle nostre quid injurie debebatur que pro universis et singulis a tempore cujus non exstat memoria et specialiter a tempore beatissimi Thome martyris principes et tyrannos in ecclesiis et bonis earum in Anglie sepius debacchantes pro conservatione ecclesiastice libertatis ac privilegio clericali tuendo auctoritate sedis apostolice toties expugnavit Quod si aliquid inhonesti literis nostris impingitur deducatur in medium et luce clarius apparebit quod in ipsis nullius justitia leditur animarum saluti consulitur indulgentie conservantur jus suum patronis redditur prelatis honor debitus exhibetur nobilibus literatis et bene meritis gratia non negatur et sic nisi corrigere delinquentis excessus et clerum in melius reformare sit vitium nihil in eis quod oculos intelligentis offendat poterit inveniri Herodiana vero severitas in clericos et maxime in Italicos agitata vel tantum desevire sperav[i]t in rebus et sic eos permisisse debuit abire jejunos vel si circa extraneos in specie voluit generali privilegio derogare cum ex impressione characteris clericalis locorum distantia vel varietate linguarum non plus uni quam alteri debeatur si per illos intelligitis generi renunciatum esse quasi per speciem restat ut suo genere major sit species quod absurdum est non solum credere sed referre cum species non sit sui generis destructiva Cursorum ergo nostrorum supplicia plus movere debuerunt speculatores nostros in Anglie quam nos ipsos Cum enim cursor cum literis apostolicis Christi exercitus et ecclesiastice libertatis quasi vexillum deferat restat ut vexillo decidente in illis partibus oppressoribus libertatis sine offendiculo alicujus per campum non refrenate licentie discurrentibus de libertatis ecclesiastice titulo desperetur Nec alicui circa partes occidentales immunitatem tanti sceleris ignorare licuit quod in partibus orientalibus fama vel verius infamia deferente non sine juris injuria et contemptu sedis apostolice jam pervenit Qui vero sciens amore vel timore tacuit in sinu suo causam recolligat et quid per nos presentandum sit speculatori omnium ipse cognoscat Igitur considerate carissimi quis dormiendo tacuit vel quis corripuit vigilando Ex quo non immerito sequitur quod si nullus corripuit nemine super grege Dominico vigilante quilibet tacente dormivit Ubi ergo pastorum vigilie Ubi speculatorum excubie Ubi zelatores animarum Ubi conservatores libertatum Ubi contra lupos audacia Ubi nobilium potentia Ubi debitum ecclesie Romane prestitum juramentum Ubi subditorum devotio Ubi cleri constantia Ubi reverentia filialis Ubi verbum Domini penetrabilius omni gladio ancipiti bis acuto Ubi ecclesiastice discipline severitas Ubi suspensio interdicti Ubi excommunicationis vinculum quod contumaces et rebelles a fidelium consortio et fidei unitate sic separat ut vita sit eis supplicium et suspecta criminis conscientia etiam dormiendo timorem incutiat damnationis eterne Quis ipso jure excommunicatos hujusmodi et raptores incendiarios et predones in sua dioecesi publicavit Quis ad relevandam Ecclesie generalis injuriam organa condolendo suspendit Quis a Jerusalem in Jericho descendenti sacerdote ac Levita pretereuntibus vulneribus sauciati vinum et oleum cum Samaritano infudit Quis ex semine Sem virtutum operatione famosus vel Japhet caritatis dilatatus amore humeris suis imponens pallium verecundiam matris sue pallio suo retrorsum incedens operuit a Caim callido denudatam Non inventis ergo Sem et Japhet ejusque seminibus in partibus Anglicanis utinam locum non habeat Noe maledictio jugum servitutis Canaan filiis imponentis Quod autem minimo clerico Anglie debebatur qua fronte negari potuit pro ecclesiastice libertatis subversione ipsius provincie generali Quod si ratione multitudinis severitati erat aliquid detrahendum quis sue salutis non immemor tanti sceleris novitatem ecclesie Romane ac nobis nuncio vel literis super contritione Joseph compatiens nunciavit Nemine autem compatiente invento recte ve Amos prophete negligentes et opulenti poterunt timere prelati Sane si universitatis titulus sine titulo indefinite loquentis universitas eorum qui magis eligunt mori quam a Romanis confundi et prelati impressio subscribentis ecce gladii duo hic pusillanimes terruit frivola causa timori affuit cum membrorum universitas sine capite et eorum qui magis eligunt mori non expressis nominibus per timore quam a Romanis confundi desperationis precedens judicium sub corporis monstruosi specie palliata speculatoris constantis animum animare potius ad vindictam quam deprimere debuisset Nec duorum gladiorum prenominata subscriptio retardare vos debuit a vindicta que cum binarius numerus sit infamis ab unitate recedens et Trinitatis mysterium non attingens cere liquiditate utens viribus hebetatis sine mittente precedens et sine auctoritate coercens cere materia liquefacta liquescet Nec aliud erga vos tempore nostro nos omisisse fatemur nisi quod in beneficiis conferendis et aliis ad instar predecessorum nostrorum remisimus tam in Anglicanis quam in aliis mundi partibus sine personarum acceptione plenitudine potestatis utentes vobis sine Italicorum injuria de speciali gratia duximus indulgendum ut ipsorum beneficia cedentibus vel decedentibus personis que ipsa detinent ad eorum donationem quorum interest libere sine alicujus contradictione redirent Non geminata ergo vivis Italicis debebatur injuria que a nobis ipsis decedentibus ceteris est illata Nec credat illa universitas iniquitas magnorum favore fulcite nos malefactorum personas et faventium nomina que tamen exprimere ad presens differimus ignorare Verum si quod non credimus aliqui pastorum ab ovibus et oves a quibusdam pastoribus consensu vel opere in hoc contagium contraxissent quid restaret aliud nisi eos a grege sibi commisso repellere ne ceteras oves labe sue contagionis inficiant Nec adeo abbreviata est manus Domini et ecclesie Romane potentia quin tangendo montes eos fumigare faciat et aspera reducat in plana Nec vos latere volumus quod a trino climate libellus triplicis supplicationis ingeritur et importune ad januam pulsavit et pulsat ecclesie gratiam postulans non novam concessam pluribus nec juri contrariam Qui si fuisset ad sacrarium exauditionis admissus et mater uteri filii sui fuisset oblita nequaquam cordis imperio oculus annuisset manus non cessasset a scelere lingua non blasphemasset in celum nec animi secreta continuationis occulte operum nova temeritas detexisset presertim ubi timore pene amor justitie superatur Ne igitur cum Lucifero ut Altissimo similis fieret sedem suam ad Aquilonem ponente quem celum sustinere non potuit gentis Babylonice sine fundamento edificantis in confusione linguarum et etiam animorum corpora temporalibus et anime suppliciis deputentur eternis surgite qui dormitis et vigiles anteponite vobis Jesum et ipsum pro salute humani generis crucifixum facientes quod thymiama opere unguentarii compositum diligenter mixtum purum et sanctificatione dignissimum malefactores ipsos qui dixerunt Domino Discede a nobis et viam obedientie tue nolumus preciosos a vite Christo qui est via non errans veritas non fallens vita non deficiens obsecrate arguite increpate in omni patientia et doctrina exemplo quoque Aaron ferentes turibulum et hausto igne de altari mittite incensum currentesque in medio multitudinis quam superbie jam devastat incendium monitionum correctionum et orationum afferre thymiama Quis enim scit si ignoscat Deus aut beneplacitum sit ei adhuc ad locum suum ossa arida revertantur et mortui reviviscant Forte vobis astantibus inter mortuos et viventes plaga cessabit Si vero velut obstinati ad monitionem nostram Deo ecclesie Romane ac nobis necnon et passis injuriam plene satisfacere forte noluerint quia peccator cum venerit in profundum malorum contemnit dictos idololatras fautores receptatores et consiliatores eorum excommunicatos et a liminibus sancte matris Ecclesie sequestratos publice nuncietis facientes excommunicationis sententiam qua propter premissos tenentur excessus singulis diebus Dominicis et festivis pulsatis campanis et candelis accensis quilibet in locis sibi subjectis auctoritate apostolica publicari donec passis injuriam satisfecerint competenter et cum vestrarum testimonio literarum ad sedem venerint Apostolicam absolvendi alias contra ipsos invocando etiam ad hoc si necesse fuerit brachium seculare per subtractionem beneficiorum et aliis modis quibus expedire videritis procedentes ut ab hedis ovibus separatis bonus pastor et in lactis dulcedine obedientes foveat et ovem errantem nunc monitis nunc terroribus ad ovile reducat et sic unum ovile et unus pastor effecti ad januam sedis Apostolice cui licet immeriti presidemus in qua tanquam lapis angularis in fidei fundamento quo nemo potest ponere preter id quod positum est successor Petri et vicarius Jesu Christi universis gratias et jura contribuit que nemini gremium suum claudit sed filio etiam prodigo revertenti occurrit securi pro venia petenda recurrant Datum Spoleti v idus Junii pontificatus nostri anno sexto