Charter Document - 08070005
| Charter Number: | 08070005 |
|---|---|
| Cartulary Title: | Annales de Burton |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1214 |
| Date type: | Assigned |
| Resource Link(s): |
British Library - Cotton MS Vespasian E III (f15v,p44) |
Charter:
Johannes Dei gratia rex Anglie [] venerabili patri S[tephano] eadem gratia Cantuariensi archiepiscopo salutem Sciatis quod secundum formam mandati domini Pape et venerabilis patris I[nnocentii] gratia Dei summi Pontificis veram pacem et plenam securitatem vobis prestamus nec non ceteris tam clericis quam laicis hoc negotium quod inter nos et Anglicanam ecclesiam versatum est contingentibus nec vos nec vestros legemus vel legi faciemus aut permittemus in personis vel rebus vobisque dimittimus omnem indignationem et in gratiam nostram vos recipimus et tenebimus bona fide et quod non impediamus aut permittemus aliquatenus impediri quominus libere vestrum officium exequamini et jurisdictionis vestre auctoritate prout debetis utamini et super his vobis juramenta et literas patentes fidelium nostrorum venerabilium patrum H[enrici] Dublinensis archiepiscopi P[etri] Wintoniensis et J[ohannis] Norwicensis episcoporum et preterea xii baronum nostrorum scilicet G[alfridi] filii Petri [] fecimus exhiberi quod ipsi bona fide studebunt quod hec pax et securitas firmiter observetur Et si forte quod Deus avertat per nos ipsos vel per alios contra venerimus ipsi pro Ecclesia contra violatores securitatis et pacis mandatis apostolicis inherebunt nosque perpetuo ecclesiarum vacantium custodiam amittemus Et ideo vos rogamus quatenus ad nos sine dilatione in Angliam venire festinetis Si quid autem in hoc scripto omissum fuerit vel minus plene factum secundum formam mandati apostolici cum ad nos veneritis perficietur Et in hujus rei testimonium has literas nostras patentes vobis mittimus Teste Dublinensi archiepiscopo