Charter Document - 08060001
| Charter Number: | 08060001 |
|---|---|
| Cartulary Title: | Annales de Theokesberia [Tewkesbury] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Assigned |
| Resource Link(s): |
British Library - Cotton MS Cleopatra A VII (f20v,p50) |
Charter:
Nuper ad audientiam nostram pervenit electio Cantuariensis ecclesie de quodam monacho Waltero nomine et postquam audivimus que pro se idem monachus et pro sua electione proposuit auditis etiam objectionibus et exceptionibus episcoporum Anglie tam contra electionem prefatam quam in personam electi per venerabiles fratres nostros Coventrensem et Roffensem episcopos et dilectum filium archidiaconum Bedefordie in audientia nostra propositis examinationem circa electi prenominati personam venerabilibus fratribus nostris domino Albanensi magistro Thoma de sancta Sabina et magistro Pietro cardinalibus commisimus faciendam Cumque electus coram illis constitutus requisitus esset de descensu Domini ad inferos utrum in carne vel sine carne descenderit male respondit Item de confectione corporis Christi in altari male respondit Item requisitus de Rachele qualiter plorabat filios suos respondit male Cum primo esset mortua Item requisitus de sententia excommunicationis contra juris ordinem lata male respondit Item requisitus de matrimonio si alter contrahentium infidelis decesserit male respondit Super his omnibus articulis diligenter examinatus est a cardinalibus quem non solum dicimus minus bene respondisse sed pessime Cum igitur nobilis sit ecclesia Cantuariensis et nobilem habuisset prelatum virum discretum modestum et de gremio Romane ecclesie assumptum et iste modo electus quem non solum pronuntiamus indignum imo si de rigore juris procederemus aliud dicere cogeremur ita insufficiens est quod ad tantum honorem non debet assumi electionem de ipso factam omnino cassamus provisionem nobis dicte ecclesie reservantes