Charter Document - 08040400
| Charter Number: | 08040400 |
|---|---|
| Cartulary Title: | Sir Christopher Hatton's Book of Seals |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1245 - 1246 |
| Date type: | Assigned |
| Resource Link(s): |
|
Charter:
Omnibus Christi fidelibus ad quos presens scriptum peruenerit Robertus de Pauely et Matildis mater eius salutem in domino Nouerit uniuersitas uestra nos pro nobis et pro heredibus nostris concessisse in perpetuum et confirmasse deo et beate Marie et hospitali sancte Trinitatis extra Norhamt et fratribus ibidem deo seruientibus stagnum molendini sui de Abynton quod abuttat super pratum nostrum de Houcton ad emendandum et reparandum secundum quod sibi uiderint expedire dum modo ulterius non eleuetur ad nocumentum dicti prati nostri absque contradictione et nocumento a nobis uel heredibus nostris amodo faciendo quod quidem stagnum Galfridus de Pauely predictis fratribus pro duobus solidis annuis ad Pascha domini concessit prout in carta dicti Galfridi continetur Preterea concessimus eisdem fratribus illam porcionem prati nostri que jacet inter certum stagnum suum et pratum nostrum de Houcton certum et continuum usque ad metam inter pratum nostrum et stagnum suum per prouisionem virorum legalium limitatam ad emendacionem et reparacionem stagni sui de qua porcione prati mota fuit contentio inter nos et dictos fratres Et si forte per inundationem aque stagnum illud sic limitatum fractum fuerit licebit dictis fratribus fracturam illam prout ad saluacionem aque necesse fuerit absque contradictione reparare ita quod reparacio illa non noceat dicto prato nostro Pro hac autem porcione prati dicti fratres nobis et heredibus nostris duodecim denarios annuos ad festum sancti Michaelis persoluent Sciendum etiam quod spatium totius stagni sui durabit in longitudine quinquaginta quinque perchatarum et dimidie scilicet ab axe rote molendini sui usque ad metam inter pratum nostrum de Houcton et stagnum molendini sui sitam Ut autem hec confirmatio rata in perpetuum permaneat eam sigillis nostris corroborauimus Facta est autem confirmacio nostra anno regni regis Henrici filii regis Johannis tricesimo Hiis testibus domino Rogero de Haclinton Willelmo Moweyn Symone Vitor Johanne de Schyrinton Roberto Springout Thome de Sancto Johanne clerico et aliis