Charter Document - 08040242
| Charter Number: | 08040242 |
|---|---|
| Cartulary Title: | Sir Christopher Hatton's Book of Seals |
| Charter Language: | Latin |
| Charter Origin: | Lay |
| Charter Type(s): | Letters Patent |
| Date: | 1333 |
| Date type: | Internal, A.D., Feast, Regnal |
| Resource Link(s): |
|
Charter:
Pateat uniuersis per presentes quod nos Elizabeth de Burgo domina de Clare soror et una heredum celebris memorie domini Gilberti de Clare nuper comitis Glouc et Hertford ad dilucidacionem iuris patronatus quod habemus in monasterio prioratus de Angleseye cum ipsum vacare contigerit pro nobis et heredibus nostris sub scriptam formam concedimus canonicis eiusdem monasterii et eorum successoribus inperpetuum obseruanda confirmamus videlicet quod quocienscunque supradictum monasterium per mortem vel cessionem vacare contigerit quod canonici dicti monasterii ad nos si in regno Anglie fuerimus vel ad senescallum nostrum de Clare qui pro tempore fuerit si extra regnum fuerimus debeant unum canonicum dicti monasterii et per eundem vacacionem monasterii predicti denunciare et licentiam eligendi priorem de gremio suo vel aliunde petere qua licentia petita libere possint procedere ad electionem electione vero facta electum suum nobis et heredibus nostris tanquam patrono presentare et consensum nostrum requirere Concedimus autem dictis canonicis et eorum successoribus quod nec nos nec aliquis heredum seu successorum nostrorum vel nomine nostro racione patronatus quem habemus in eorum monasterio possit aliquam destructionem facere in eodem monasterio tempore vacacionis sue vendendo largiendo distrahendo bona eorum aut mutando aliqua quorum mutacio ad damnum eiusdem monasterii esse possit comprobari Et ut nulla occasio detraccionis vel destruccionis fiat volumus et eisdem canonicis concedimus pro nobis et heredibus nostris ut in tempore vacacionis quamdiu monasterium suum vacare contigerit non habeamus nec aliquis successorum nostrorum nisi tantum unum hominem qui propter recognicionem iuris patronatus nostri seu successorum nostrorum capiat simplicem seysinam qui nullam faciat destruccionem pro ut superius dictum est Qui cum seysinam predictam in forma predicta ceperit tradat et committat subpriori dicti prioratus aut eiusdem locum tenenti et aliis officiariorum sanioribus predicte domus omnia bona eorundem ad saluandum et ad utilitatem monasterii sui predicti custodiendum constituendo etiam quendam garcionem qui custodiat portas dicti prioratus loco janitoris comedendo et bibendo in refectorio dictorum canonicorum ad mensam fratrum conuersorum durante tempore vacacionis quousque eisdem de priore et pastore fuerit prouisum Hanc igitur formam supradictam et libertatem concedimus dictis canonicis et ecclesie sue contra quam nolimus quod nos aut aliquis heredum seu successorum nostrorum vel nomine nostro aliquid in preiudicium sepe dicti monasterii attentet vel faciat Et ut hic nostra concessio et confirmacio plenum teneat robur et effectum inperpetuum sigillum nostrum presentibus est appensum Hiis testibus domino Johanne de Cantebrig domino Alexandro de Walsham domino Johanne de Wauton domino Waltero Trayly militibus domino Thome de Chedworth magistro Willelmo de Brampton Johanne de Engayn de Theuersham Willelmo Muchet de Fenditton et aliis Datum apud Angleseye die mercurii proxima post festum sancti Mathei apostoli et evangeliste anno domini millesimo CCC tricesimo tercio et anno regni regis Edwardi tercii a conquestu septimo