Charter Document - 08040161
| Charter Number: | 08040161 |
|---|---|
| Cartulary Title: | Sir Christopher Hatton's Book of Seals |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1298 |
| Date type: | Internal, Feast, Regnal |
| Resource Link(s): |
|
Charter:
Sciant presentes et futuri quod ego Henricus de Pynkeneye dominus de Wedon Pynkeneye frater et heres quondam Roberti de Pinkeneye pro salute anime mee et predicti Roberti fratris mei et pro salute antecessorum meorum dedi concessi et hoc presenti scripto meo confirmaui deo et ecclesie beate Marie de Esseby et canonicis ibidem deo seruientibus totam pasturam illam que uocatur le Hulles cum duobus holmis in campis de Wedon et Weston quam prius habuerant et diu tenuerant de dono et antiquo feofamento Roberti del Ho militis et eciam de confirmacione domini Henrici patris mei et ceterorum predecessorum meorum quam quidem pasturam predictus Robertus frater meus cum adhuc uiueret ad magnum dampnum dictorum canonicorum sibi usurpauerat Preterea concessi eisdem et presenti scripto meo confirmaui omnes terras et tenementa in uillis et campis de Wedon Pinky Weston et Wappeham et in eadem consuetam bosci distribucionem in quas et in que habuerunt ingressum per donaciones et specialia feofamenta predictorum antecessorum meorum diu ante et post decessum predicti Roberti fratris mei Et eciam quod a festo sancti Michaelis usque ad purificacionem beate Marie proxime sequentis quolibet anno in omnibus terris et pratis meis dominicis cum aueriis suis absque calumpnia uel impedimento mei uel heredum seu quorumcumque assignatorum meorum licite possint communicare Habendam et tenendam dictam pasturam in Hulles et holmis inseparabilitate cum competenti via adminus latitudinis triginta pedum ad chaciam quorumcumque animalium suorum fugando ea per terras meas et re fugando sine dispendario in pratis meis faciendo Ac eciam omnes predictas terras et tenementa libertates et consuetudines liberas ab omni genere seruicii secularis quietas et absolutas dictis deo ecclesie canonicis et eorum successoribus bene et pacifice inperpetuum sicut ulla elemosina liberius quietius et purius dari poterit et concedi Et ego predictus Henricus et heredes mei vel assignati qualescumque ad quorum manus contigerit terras et tenementa mea in predictis uillis deuenire dictis deo ecclesie canonicis et eorum successoribus predictam pasturam et omnes terras et tenementa predicta sicut eis a predictis predecessoribus meis caritatiue collata tanquam liberam puram et perpetuam elemosinam contra omnes gentes et earum calumpnias warantizabimus acquietabimus et defendemus inperpetuum In omnium premissorum testimonium presenti scripto sigillum meum apposui Hiis testibus domino Radulfo rectore de Norton domino Ricardo de Bray rectore de Wodeford Willelmo de Sancto Johanne domino de Plumpton Galfrido Luuel de Farthingeston Waltero de Bradden Egidio de Morton Johanne le mareschal de Esseby et aliis Datum apud Wedon Pinky in festo annunciacionis beate Marie anno regni regis Edwardi vicesimo sexto