Charter Document - 08040134

Nouerint uniuersi quod cum mota esset contencio inter Margaretam de Ros unam heredum Petri de Bruys ex parte una et Willelmum de Wyndeshou ex altera de quodam molendino leuato in Grarig per eundem Willelmum per quod secta quam tenentes ipsius Willelmi de Grarig facere solebant ad molendinum ipsius Margarete de Patton subtrahebatur ut ipsa Margareta dicebat et unde placitum motum fuit inter eosdem in curia domini Regis per breue dicta contencio inter eosdem die sancti Stephani anno regni Regis Edwardi quinto in hac forma amicabiliter conquieuit videlicet quod dicta Margareta concessit pro se et heredibus suis dicto Willelmo et heredibus suis quod illud molendinum quod dictus Willelmus leuauit in Grarig stet in perpetuum in loco quo situm est uel in alio loco in Grarig reedificetur et hoc tam de consensu dicte Margarete uel heredum suorum quam dicti Willelmi uel heredum suorum si viderint expedire Et pro ista concessione concessit dictus Willelmus pro se et heredibus suis quod dicta Margareta et heredes sui habeant in feodo et hereditate in perpetuum medietatem dicti molendini cum medietate tocius multure commoditatis et tocius exitus de molendino predicto proueniencium et eciam dicto molendino sine contradictione dicti Willelmi et heredum suorum pertinencium Ita quod dictus Willelmus et heredes sui habeant aliam medietatem dicti molendini et tocius exitus eiusdem molendini sicut predictum est sine contradictione dicte Margarete uel heredum suorum in perpetuum Preterea idem Willelmus et heredes sui piscariam totius dicti molendini et stagni eiusdem omnimodam et integram habeant in perpetuum Et dictus Willelmus et heredes sui molent bladum suum ad predictum molendinum de gwaneria proprie carruce sue unius et triginta carrucarum annuatim de precariis in Grarig et proprium bladum suum ex alibi ueniens ad propriam mensam suam apud Grarig sine multura Et dicta Margareta et heredes sui molent bladum suum ad dictum molendinum de Grarig ad propriam mensam suam ubicumque fuerint et quocienscunque uoluerint sine multura Et omnes homines dicti Willelmi uel heredum suorum de Grarig molent blada sua ad molendinum predictum de Grarig ad tertium decimum vas sicut molere consueuerunt ad molendinum de Patton Set homines dicti Willelmi et heredum suorum de Grarig tenentes per cartam omnes et singuli quicunque fuerint molent blada sua ad molendinum de Patton sicut molere consueuerunt sine contradictione dicti Willelmi uel heredum suorum inperpetuum Et dicta Margareta et heredes sui inuenient boscum ad meremium dicti molendini sustinendi et reparandi in haya de Kirkeby Et dictus Willelmus et heredes sui dictum meremium sumptibus suis propriis cariabunt Et tam dicta Margareta et heredes sui quam dictus Willelmus et heredes sui dictum molendinum de communi commoditate eiusdem molendini exeunte uel ad eundem molendinum pertinente communiter ut predictum est sustinebunt et reparabunt commoditates et exitus eiusdem molendini quoscunque provenientes ut predictum est nulla parte contradicente communiter recipientes in perpetuum In cuius rei testimonium ambe partes huic scripto cirograffato alternatim sigilla sua apposuerunt Hiis testibus Rogero de Loncast Ranulfo de Daker Michaele de Hartecla tunc vicecomite Westmerland Thomas de Mussegrap Henrico de Staueley militibus Willelmo de Lindesey Willelmo de Stirkel Gileberto de Qwyteby Radulfo de Patton Thome de Derley Rogero de Burnoluish Gileberto filio suo Henrico clerico et aliis