Charter Document - 08040012

Hec est conuencio facta et confirmata inter dominum Rogerum de Sumery ex una parte et abbatem et conuentum de Geroudon ex altera videlicet quod idem dominus Rogerus de Sumery concessit eisdem abbati et conuentui pro se et heredibus suis inperpetuum quod possint habere clausum totum boscum suum de Kut Preterea dedit et concessit et quietum clamauit eisdem quicquid juris vel clamium habuit vel habere potuit in eodem clauso de Kut salua bersa sua sibi et heredibus suis ita tamen quod haya eorundem inter clausum suum de Kut et boscum Ricardi militis de Torp non excedat quatuor pedes in altitudine et ab angulo nemoris dicti Rogeri usque dum veniat ex opposito de Thweyt similiter quatuor pedes non excedat et inde ex transverso usque ad Thweyt tres pedes tantum habeant Dedit etiam et concessit et quietum clamauit dictis abbati et conuentui inperpetuum pro se et heredibus suis quod possint claudere totam illam placiam bosci et quicquid in ea habuit vel habere potuit que est inter fossatum de Kut et hayam que se extendit a Thweyt ex occidentali parte marlarie usque ad bercariam cheuerie dictorum monachorum ita quod haya tres pedes non excedat in altitudine Et conuenit inter eos quod quociens dictus dominus Rogerus et heredes sui venerint ibi ad bersandum intrabunt dictum clausum ad insequendum feras suas sicut eis placuerit per duas portas quas habebunt loco competenti unam scilicet iuxta le Thweyt et aliam inter le Thweyt et caprariam Conuenit etiam inter eos quod nullam clausuram nec fossatum circa dictum clausum construent nisi quod continetur in scripto superius nominato et si fecerint quod superfluum fuerit deponetur In cuius rei testimonium huic scripto in modum cyrographi confecto tam dictus dominus Rogerus quam prefati abbas et conuentus utrimque sigilla sua apposuerunt Hiis testibus domino Ricardo milite de Torp domino Ricardo de Amberleya Nicholao de Marnham Serlone de Torp Ricardo filio eius Roberto Bars de Dixel et aliis