Charter Document - 07920385
| Charter Number: | 07920385 |
|---|---|
| Cartulary Title: | Chronicon Abbatiae Ramesiensis |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1163 - 1178 |
| Date type: | Assigned |
| Resource Link(s): |
Bodleian Library - MS. Rawl. B. 333 (f51r) |
Charter:
[Gilbertus] Dei gratia Lond[oniensis] episcopus omnibus ad quos presens carta pervenerit salutem Universitati nostre notum fieri volumus quod causam que vertebatur inter dominum Willelmum abbatem de Ramesia et Godefridum presbiterum super ecclesie de Depedale a domino Papa nobis delegatam mediante concordia hoc modo terminavimus Partibus in presentia nostra constitutis miles quidam Walterus de Grisio Monte quem dictus presbiter sue presentationis laudavit auctorem publice cognovit quod jus patronatus illius ecclesie ad Ramesense monasterium pertineret et si quid juris ad eum vel ad fundum ejus super ea re pertinebat in manu nostra resignavit et Ramesiensi monasterio concessit fide data promittens quod nunquam de cetero per se vel per alium adversus eos super hoc querelam moveret Quo facto prenominatus presbiter procedens in medium publice confessus est quod personatum illius ecclesie per injustam presentationem fuisset adeptus et eandem in manu nostra liberam spontanea voluntate resignavit Nos igitur jus Rameseiensis monasterii ex confessione partium plenius cognoscentes tam jus advocationis quam ipsam ecclesiam quantum ad nos pertinebat apostolica freti auctoritate domino abbati et per eum Ramesiensi monasterio assignavimus perpetuo possidendam et presenti scripto confirmavimus Hoc autem factam est Lond[onie] apud Sanctum Paulum sub presentia nostra et meliorum capituli nostri et sub his testibus Radulpho de Disci et Ricardo Folioth archid[iaconis] magistro Hugone et magistro Henrico canonicis nostris Johanne et Alexandro monachis decano de Hulmo Ruelando Petro de Bramcestre Hugone archidiacono de Bramcestre Adam presbitero de Burnh[am] et Willelmo de Depedale et aliis multis