Charter Document - 07870120

Nouerint uniuersi quod anno a Natiuitate Domini MCCCVIII in festo sancti Andree apostoli dominus Godefridus permissione diuina abbas de Burgo Sancti Petri uolens anime sue et animarum patris sui matris sue fratrum suorum sororum suarum parentum suorum abbatum successorum confratrum suorum et omnium monasterii benefactorum saluti prospicere ad eternam memoriam ordinauit concessit et assignauit sacro conuentui suo in eodem monasterio Deo famulanti totum manerium de Lullington per ipsum abbatem regali assensu et largicione adquisitum cum omnibus suis pertinenciis et cum omni seruicio liberorum hominum et bonorum cum omnibus commoditatibus predicto manerio pertinentibus Et lxxiiij acras terre cum iiij acris prati et redditum xviij denarios per annum que predictus abbas in Burgo Dodisthorp Carton Estfeld Newerk Walton et Eye perpetualiter adquisiuit et totum illud pratum cum nouo calceto quod est inter Burfen et Oxeneylode quod idem abbas similiter adquisiuit et ualet per annum c solidos Habendum et tenendum predictum manerium et totam predictam terram cum prato calceto et redditu cum omnibus suis iuribus et pertinentiis inperpetuum predicto conuentui pro oneribus infra scriptis annuatim futuris temporibus fideliter faciendis et in usus subscriptos absque diminucione conuertendis Videlicet c solidos pro nouis ornamentis ecclesiasticis prouidendis et in usum ecclesie ante dicte absque alienacione conseruandis Et si fortassis propter minoritatem pecunie ad ornamentorum prouidentiam singulis annis non sufficiant tunc pro diuersis annis in thesaurario conuentus sub certa custodia colligantur et reponantur quousque per disposicionem conuentus ornamenta decencia utiliter poterunt comparari Et c solidos pro cera emenda ad inueniendum luminare et sustinendum circa tumbam ipsius abbatis singulis annis sue deposicionis uel anniuersarii Ita ut completis exequiarum anniuersariis solemnis quatuor libre cere capelle beate Marie et quatuor libre altari Sancte Crucis et quatuor libre capelle beati Thome martiris iuxta portam ad honorem diuini cultus conuentus disposicione fideliter erogentur Et quia luminis prouidentia circa fratres dicti monasterii decedentes tempore humacionis nimis est exilis ut apparet ideo abbas uult et concedit quod xx libre cere cedant in augmentacionem illius officio diuino completo disposicione sub sacriste conseruande et totum residuum illius cere in predicto monasterio circa diuina misteria futuris temporibus honorifice dirigatur Et c solidos annuatim pauperibus ad dictum monasterium accedentibus certis temporibus iuxta ordinacionem ipsius abbatis dum uixerit et post mortem suam tempore sue disposicionis perpetuis temporibus erogandos Et c solidos die sue deposicionis uel anniuersarii refectioni conuentus seu recreacioni in perpetuum distribuendos