Charter Document - 07860028

Reverendo in Christo patri domino Olivero Dei gratia Lincolnie episcopo Officialis curie Cantuarie salutem in salutis auctore Sua nobis procurator abbatis et conventus de Burgo sancti Petri vestre dioecesis peticione monstravit quod cum iidem abbas et conventus ad ecclesiam de Cloptona dicte dioecesis vacantem tanquam veri patroni ejusdem vobis Thomam de Deyvile presbiterum canonice presentassent ac Willelmus dictus Campiun de Yrtlingburgo ad vos litteras apostolicas super provisione ejusdem ut asserit impetrasset auctoritate quarum sibi petebat per vos de dicta ecclesia provideri ex parte dictorum abbatis et conventus coram vobis congruis loco et tempore fuit excipiendo propositum quod cum eisdem religiosis a sede apostolica esset indultum ut nulli per litteras apostolicas vel legatorum ejusdem sedis apostolice de beneficio ecclesiastico vel pensione teneantur aliquatenus providere nisi in eisdem litteris de indulto hujusmodi plena et expressa mencio habeatur ac de mandato Romanorum pontificum de beneficiis ecclesiasticis ad ipsorum religiosorum collacionem seu presentacionem spectantibus quatuor vel quinque clericis sit provisum qui ex provisione hujusmodi eadem beneficia adhuc optinent necnon tres vel quatuor clerici quibus de beneficiis ecclesiasticis pertinentibus ad presentacionem seu collacionem religiosorum ipsorum ante impetracionem prefati Willelmi mandabatur a sede apostolica provideri beneficia ratione provisionum hujusmodi adhuc expectent sicut erant probare parati prefatusque Willelmus Campiun propter defectum ordinis et aliis de causis non esset idoneus ad beneficium ecclesiasticum optinendum nec de vita et conversacione ejusdem Willelmi secundum formam mandati apostolici fuisset legitime inquisitum vos auctoritate dictarum litterarum nullam mencionem faciencium de premissis que si fuissent expressa eedem littere non fuissent obtente eidem Willelmo de prefata ecclesia providere minime potuistis Et quia vos dictos religiosos super hiis audire et eisdem ad exhibendam suam indulgenciam prelibatam competentem dilacionem concedere licet hoc in forma juris humiliter petivissent contra justiciam denegastis dicti religiosi sencientes se ex hiis et eorum quolibet per vos indebite pregravari sedem apostolicam et pro tuicione sedem Cantuarie ut asserit legitime appellarunt Sed vos premissis non obstantibus prefato Willelmo Campiun de dicta ecclesia de Cloptona providistis injuste formam dicti mandati apostolici non servantes propter quod dicti religiosi sencientes [se] per vos iterato pregravari sedes predictas ut prius appellarunt Quare vobis inhibemus et per vos quibuscumque jus inhibere requirit ne pendente in curia Cantuarie hujusmodi appellacionis tutorio negocio quicquam hac occasione in prejudicium dictorum religiosorum adtemptatis vel attemptent faciatis vel faciant aliquatenus attemptare quo minus liberam prosecutionem sue appellacionis prout justum fuerit habeant utriusque Citantem etiam dictum Willelmum Campiun partem appellatam quod compareat coram nobis vel commissario nostro generali in ecclesia beate Marie de Arcubus Londoniis quarto die juridico post festum sancti Hillarii in dicto tutorio appellacionis negocio facturum et recepturum quod justicia suadebit Et quid super premissis feceritis nobis vel commissario nostro dictis die et loco per litteras vestras patentes [] Datum Londoniis in festo sancte Lucie virginis anno gratie M ducentesimo octogesimo primo