Charter Document - 07860027

In nomine Domini Amen Coram vobis venerabili patre domino Olivero Dei gratia Lincolnie episcopo unico provisore seu executore a sede apostolica in negocio infrascripto deputato Ego Willelmus Campiun de Irtlingburc pauper clericus vestre dioecesis constitutus infrascripta propono Cum per sanctissimum patrem dominum Martinum papam quartum vobis per apostolica scripta demandatum existat quod vos de vita et conversacione mea sollerter inquirentes si me vite laudabilis et honeste conversacionis esse reppereritis et aliud ecclesiasticum beneficium non optineam nec alias pro me scripserit idem dominus papa aliudque canonicum non obsistat michi secundum mee probitatis merita de competenti beneficio cum cura vel sine cura consueto ab olim clericis secularibus assignari spectante ad collacionem vel presentacionem dominorum abbatis et conventus monasterii sancti Petri de Burgo ordinis sancti Benedicti Lincolnie dioecesis conjunctim vel divisim si quod in civitate vel dioecesi Lincolnie tempore concessionis littere provisorie michi in hac parte concesse vel quam cito ad id offerret se facultas dummodo pro alio non scripserit dictus dominus papa super conferendo sibi beneficio ad eosdem abbatem et conventum pertinente vel ipsi non sint super alterius provisione auctoritate apostolica gravati per vos vel per alium seu per alios providere procuretis inducentes me in corporalem possessionem ipsius beneficii et defendentes inductum Cumque ecclesia parochialis de Cloptona ad dictorum abbatis et conventus de Burgo collacionem seu presentacionem notorie spectans ad presens de jure vacet et de facto que ecclesia competens dici potest michi beneficium et est in occasu facta per vos inquisicione predicta in forma vobis demandata prout vobis constat legitime nichil canonicum michi compertum obsistere scilicet cujus pretextu prefate ecclesie provisionem vobis immo verius domino pape reservastis decernentes quicquid contra hoc actum fuerit irritum et inane inhibentes eisdem abbati et conventui ne contra hujusmodi factum vestrum aliquid per se vel per alium attemptent vel attemptari faciant quoquomodo in elusionem mandati apostolici seu prejudicium reservacionis vestre vel decreti supradicti Quare humiliter peto ego dictus pauper clericus et instanter mihi secundum formam naturam vim et effectum prefate littere provisorie de prefata ecclesia de Cloptona provideri et me in corporalem possessionem ipsius ecclesie per vos venerabilem patrem predictum prout facti qualitas et natura requirit induci et defendi inductum ac justicie complementum michi in omnibus exhiberi non obstante reclamacione Thome Deyvile ad dictam ecclesiam post reservacionem et decreti interposicionem ac inhibicionem vestras predictas seu dicte littere provisorie exhibicionem vobis factam ad dictam ecclesiam vobis ut dicitur presentati nec obstante quoquam alio quod in mei prejudicium vel mandati apostolici elusionem fecerint abbas et conventus memorati