Charter Document - 07860024

Oliverus permissione divina Lincolnie Episcopus unicus executor super provisione Willielmi Campiun de Irtlingburco pauperis clerici a sede apostolica deputatus dilecto in Christo filio magistro Nicholao clerico domini archidiaconi Norhamtonie salutem gratiam et benedictionem Quia auctoritate litterarum sanctissimi patris domini Martini pape quarti quas vobis per dictum clericum mittimus inspiciendas nobisque illico remittendas per eundem sollerti inquisicione prehabita dictum clericum bene morigeratum esse laudabilis testimonii ac alias idoneum ad hujusmodi beneficium ecclesiasticum secundum formam mandati apostolici optinendum reperientes mandatoque apostolico reverenter obedire cupientes ecclesiam de Cloptona nostre dioecesis cujus patronatus ad ipsos religiosos abbatem et conventum de Burgo sancti Petri pertinere dinoscitur de jure et de facto nunc vacantem sicut dicitur vel si quid aliud vacat ad presens vel quamcito ad id obtulerit se facultas spectans ad collacionem vel presentacionem eorundem donacioni nostre immo verius apostolice reservavimus et adhuc re[servamus] juxta virtutem mandati suprascripti dicto pauperi clerico conferendum decernentes ex nunc irritum et inane si per eosdem vel alios in hac parte secus fuerit attemptatum Vobis mandamus sub pena canonice districcionis firmiter injungentes quatinus memorato abbati et conventui suo per eundem reservacionem et decretum nostrum publicantes sub bono testimonio inhibeatis eisdem ne contra hujusmodi factum nostrum aliquid per se vel per alium attemptent vel attemptari faciant quoquo modo in elusionem mandati apostolici seu prejudicium reservacionis nostre vel decreti supradicti denunciantes nihilominus ex gratia speciali predicto domino abbati et conventui suo per eundem quod compareant coram nobis tertio die juridico post festum Omnium Sanctorum ubicumque tunc fuerimus in nostra dioecesi si quid canonicum habuerint quare ad provisionem vel collacionem supradictam procedere non debeamus proposituri et ulterius facturi et recepturi quod racioni convenit et equitati Et quid super hiis omnibus feceritis nobis per litteras vestras patentes harum seriem continentes significetis pro tempore oportuno Datum Londoniis septimo idus Octobris anno Domini MCCLXXX primo et pontificatus nostri anno secundo