Charter Document - 07860020
| Charter Number: | 07860020 |
|---|---|
| Cartulary Title: | Chronicon Petroburgense. The Black Book of Peterborough. |
| Charter Language: | Latin |
| Charter Origin: | Lay |
| Charter Type(s): | Notification |
| Date: | 1284 |
| Date type: | Internal, A.D., Feast |
| Resource Link(s): |
|
Charter:
Universis sancte matris ecclesie filiis ad quorum noticiam presentes littere pervenerint Mabilia de Keningtona salutem in Domino sempiternam Noverit universitas vestra me teneri et obligari reverendo in Christo Patri domino Ricardo Dei gratia abbati de Burgo sancti Petri et ejus successoribus in sexcies viginti et decem marcas bonorum et legalium sterlingorum pro maritagio Galfridi et Petri filiorum et heredum domini Petri de la Mare militis nuper defuncti solvendas dicto domino abbati vel ejus successoribus terminis infra scriptis videlicet die Dominica in Ramis Palmarum proximo sequenti quadraginta et quinque marcas in festo Nativitatis sancti Johannis Baptiste quadraginta marcas et in festo sancti Michaelis quadraginta et quinque marcas Pro qua quidem pecunia terminis supradictis plenaria solvenda obligo me heredes meos executores et omnia bona mea mobilia et inmobilia presencia et futura ubicumque existencia domino abbati supradicto et ejus successoribus volens et concedens per presentes quod si in solucione dicte pecunie suis terminis deficere me contingat quod absit vel cessare omnia bona mea mobilia et inmobilia per ballivos cujuscumque vicecomitis in cujus ballivi dicta bona inventa fuerint capiantur vendantur et per eosdem de eisdem totum quod de dicta pecunia a retro fuerit sine contradiccione seu reclamacione mei heredum vel executorum meorum plenaria levetur Et ad majorem hujus rei securitatem dominus Willelmus de Colevile miles Willelmus de Torp Gilbertus de Bernake Galfridus de Ettona et Ricardus de Wodecroft pro me debitores principales se in solidum constituerunt Ita quod liceat predicto abbati ejus successoribus et eorum ballivis de bonis suis mobilibus et inmobilibus infra libertatem suam inventis totum illud quod de dicta pecunia suis terminis a retro fuerit levare una cum dampnis et expensis que occasione dicte solucionis minus facte seu retardate fecerit vel fecerint sustinuerit vel sustinuerint in premissis De quibus omnibus et singulis credatur simplici verbo dicti abbatis successorum suorum vel eorum certi attornati absque alio onere probacionis Subicientes nihilominus se heredes assignatos et executores suos cohercioni quorumcumque judicum ecclesiasticorum vel civilium coram quibus dictus abbas vel ejus successores eos vel eorum aliquem vel aliquos voluerit seu voluerint convenire Renunciantes etiam in premissis pure sponte et absolute omnibus litteris impetratis seu impetrandis et maxime regie prohibicioni ac privilegio crucis assumpte et assumende indulto et indulgendo et omnibus aliis excepcionibus cavillacionibus seu dilacionibus facti et juris loci et temporis que contra presens instrumentum obici poterunt et per quas solucio adnullari valeat seu quoquo modo differri terminis supradictis In cujus rei testimonium sigillum meum una cum sigillis predictorum qui pro me debitores principales ut predictum est se constituerunt huic instrumento est appensum Datum apud Burgum in crastino Annunciacionis beate Marie anno Domini MCCLXXX quarto Et nos Willelmus de Colevile Willelmus de Torp Gilbertus de Bernake Galfridus de Ettona Ricardus de Wodecroft pro domina predicta principales debitores ut premissum est constituti in hujus rei robur et testimonium sigilla nostra presentibus apposuimus Datum anno die et loco supradictis