Charter Document - 07860014
| Charter Number: | 07860014 |
|---|---|
| Cartulary Title: | Chronicon Petroburgense. The Black Book of Peterborough. |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1283 |
| Date type: | Internal, Calendar, Regnal |
| Resource Link(s): |
|
Charter:
Rex vicecomiti salutem Quot fraudum et machinacionum generibus lingua Walensis ad instar vulpium progenitores nostros nos et regnum nostrum invaserit a tempore cujus non potest hominis memoria recordari quot strages magnatum nobilium et aliorum tam Anglicorum quam aliorum juvenum atque senum mulierum et etiam parvulorum fecerit quot castrorum et maneriorum incendia tam nostrorum quam aliorum incolarum regni hujus posuerit quociens turbaverit et infecerit regnum nostrum Deum et hominem non verendo vix possit lingua hominis per singula enarrare Verum qualiter hiis diebus ut preterita taceamus Lewelinus filius Griffini Wallie quondam princeps et David germanus ejus spreto fidelitatis quam nobis fecerant debito assueta relinquere non valentes prodicionibus solito villas nostras subito combusserunt et proh dolor quibusdam fidelibus nostris occisis et quibusdam combussis et aliis carceribus mancipatis castra nostra invadere ausu temerario presumpserunt fundendo inmaniter sanguinem innocentem jam est regni nostri singulorum auribus inculcatum Sed ille qui postquam peccatoris conversionem diucius expectavit ipsum induratum precipitari permittit hujusmodi fraudibus machinationibus incendiis et cedibus inhumanis ut apparet verisimiliter inponere finem volens prius dicto principe interfecto tandem dictum David qui quasi ultimus superstes de dictorum proditorum genere habebatur captivatum per homines lingue sue nostro carceri destinavit Super quo eidem gratias agimus sicut ipsum factorem credimus hujus rei Et quia cum fidelibus nostris volumus habere colloquium quid de David fieri debeat memorato quem relegatum susceperamus nutrierimus orphanum et nutritum ditaveramus de propriis terris nostris ipsum inter majores pallacis nostri collocantes tibi precipimus firmiter injungentes quod in pleno comitatu tuo eligi facias duos milites de discrecioribus et sapientioribus comitatus tui ad nos pro toto comitatu tuo venturos ita quod sint ad nos apud Sallopiam in crastino sancti Michaelis nobiscum super hiis et aliis locuturi Et hoc nullatenus omittas Teste meipso apud Rothelan xxviii die Januarii anno regni nostri xi