Charter Document - 07730012

Robertus Dei gratia Rex Scottorum [] quod nos magna et consueta regni nostri pericula proditiones et insidias diligenti consideratione attendentes que sepius nostre regie majestatis regno nostro et incolis ejusdem ex mora inhabitatione et receptione monachorum Anglicorum Dunelmie prioratum de Coldingham diutissime occupantium damnabiliter provenerunt volentesque indemnitati paci et securitati prelibati regni nostri et hominum nostrorum impostorum consulere necnon utilitati prioratus predicti affectu regio providere Cum ordinatio ejusdem prioratus ex causa foris facti loci exspoliatione et desolatione ejusdem per eosdem monachos vacui et derelicti nostram majestatem concernat et ad hoc potestas ad manus nostras juxta leges regni nostri existat liquido devoluta ex deliberato concilio pro salute anime nostre antecessorum et successorum nostrorum regum Scotie damus et concedimus applicamus unimus et incorporamus ac etiam presenti carta nostra confirmamus Deo et beate Marie Virginis ecclesieque Sancte Trinitatis et monasterio Sancte Margarete regine de Dumfermlyn predictum prioratum integrum de Coldingham cum tota Baronia ejusdem pertinentiis suis et appenditiis quibuscunque tenendam habendam applicandam incorporandum [] prefato monasterio de Dumfermlyn abbati et conventui ejusdem et eorum successoribus de nobis et heredibus nostris in perpetuum in puram et perpetuam elemosinam in terris et aquis tenandriis et feodis ecclesiis et ipsarum juribus et ecclesiarum advocationibus presentationibus et jure patronatus molendinis et piscationibus in moris maresiis nemoribus boscis planis pratis pascuis et cum omnibus aliis commoditatibus et aisiamentis ad dictum prioratum et ad dictam baroniam spectantibus tam non nominatis quam nominatis et expressis in omnibus et per omnia modo pariter et forma quibus dictum prioratum et dictam baroniam prior et monachi Dunelmenses tenuerunt Sic videlicet quod monachi de conventu de Dumfermelyn qui in ipso prioratu divino cultui debeant jugiter insistere ibidem mittantur et maneant tot quidem numero quot hospitalitatis onere et aliis oneribus necessariis attentis de fructibus et proventibus prefati prioratus honeste valeant sustentari ad nutum abbatis mittendi et revocandi prout sibi videbitur pro statu utriusque loci utilius ordinandum Prior autem in dicto loco preficiendus de gremio collegii de Dumfermelyn vel de dicto prioratu per abbatem ipsius cum suo consilio assumatur et episcopo Sancti Andree qui pro tempore fuerit presentetur Qui mox per eundem admissus plenam administrationem bonorum dicti prioratus habebit ita tamen ut dedictus bonis et administratione suis singulis annis dicto abbati respondeat ac rationem reddat absque rationabili causa et evidenti utilitati utriusque loci id exposcente prout cum consilio dicti Domini episcopi fuerit faciendum a sua administratione nullatenus amovendus In cujus rei testimonium presenti carte nostrum precipimus apponi sigillum Testibus venerabili in Christo Willelmo episcopo Sancti Andree Johanne primogenito nostro de Carrick senescallo Scotie Roberto de Fyfe et Menteth filio nostro dilecto Willelmo de Douglas et de Marr consanguineo nostro comitibus venerabili viro magistro Johanne de Pebles archidiacono Sancti Andree cancellario Jacobo de Lindesay nepote nostro Alexandro de Lindesay consanguineo nostro militibus Apud Perth vicesimo quinto die mensis Julii anno ab incarnatione Domini millesimo trecentesimo septuagesimo octavo et regni nostri octavo