Charter Document - 07670001
| Charter Number: | 07670001 |
|---|---|
| Cartulary Title: | Register of the Abbey of Arbroath. British Library - Add MS 33245 |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1308 |
| Date type: | Internal, Calendar, Regnal |
| Resource Link(s): |
People of Medieval Scotland |
Charter:
Robertus Dei gracia rex Scottorum vicecomitibus et balliuis suis de Forfar salutem Regie conuenit dignitati religiosorum causas defendere et eorum status in stabilitate regia sollicitudine prouidere Hinc est quod alienaciones terrarum que per abbates et monachos monasterii nostri de Abirbrothoc cuius patronatum gerimus qualitercunque seu ubicumque infra regnum nostrum facte sint usque modo tenore presencium dignum duximus reuocandas et in manus nostras saysiendas quousque de modis et causis alienacionum huiusmodi per legem discussum fuerit coram nobis quequidem omnia nostro proprio examini reseruamus Quare vobis firmiter precipimus et mandamus quatinus omnes terras decimas et redditus ad dictum monasterium de Abirbrothoc spectantes quos uel quas infra balliam vestram sic alienatas seu alienatos inueneritis in manibus secularium personarum in manus nostras saysiri et firmas decimas ac redditus leuari faciatis quousque aliud a nobis super hiis specialiter habueritis in mandatis Et hoc sicut indignacionem nostram vitare volueritis nullo modo omittatis Testibus Bernardo cancellario nostro Gilberto de Haya Normanno de Lesly Mogundo de Gleneske militibus Apud Perth decimo quarto die mensis Octobris anno regni nostri tercio