Charter Document - 07580016
| Charter Number: | 07580016 |
|---|---|
| Cartulary Title: | Charters of the Royal Burgh of Ayr |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1330 |
| Date type: | Internal, Calendar, Regnal |
| Resource Link(s): |
People of Medieval Scotland |
Charter:
Dauid Dei gracia rex Scottorum omnibus probis hominibus tocius terre sue salutem Sciatis nos burgenses burgi nostri de Are terras suas homines suos et vniuersas eorundem possessiones ac omnia bona sua mobilia et inmobilia sub firma pace et protectione nostra iuste suscepisse Quare firmiter prohibemus ne quis eis malum molestiam seu grauamen aliquod inferre presumat iniuste super nostram plenarium foris facturam Concessimus eciam eisdem vt nullus namos suos aut hominum suorum capiat pro alicuius debito plegiagio vel forisfacto nisi pro eorundem proprio debito plegiagio vel forisfacto saluis burgis nostris firmiter inhibentes ne quis contra hanc concessionem nostram ipsos vexare presumat iniuste super eandem nostram plenarium foris facturam Mandamus insuper et firmiter precipimus justiciariis vicecomitibus prepositis et eorum balliuis ad quos presentes littere peruenerint vt omnes illos in eorum balliis seu burgis qui debita debent prefatis burgensibus ad eadem debita eis vel eorum certo attornato latori presencium iuste et sine dilacione reddenda secundum quod iidem burgenses vel dictus eorum attornatus dicta debita sibi deberi ab eisdem racionabiliter probare poterunt vel poterit coram eis prout iustum fuerit compellant ita quod pro eorundem defectu amplius inde iustam querimoniam non audiamus In cuius rei testimonium has litteras nostras perpetuo duraturas sibi fieri fecimus patentes Apud Perth vicesimo octauo die Marcii anno regni nostri primo