Charter Document - 07580014

Robertus Dei gracia rex Scottorum omnibus probis hominibus tocius terre sue clericis et laicis salutem Sciatis nos dedisse concessisse et hac presenti carta nostra confirmasse burgensibus burgi nostri de Are quinque denariatas terre nostri de Auleway Cortoun et Gortloy Tenendas et habendas eisdem burgensibus et eorum successoribus de nobis et heredibus nostris in feodo et hereditate per omnes rectas metas et divisas suas libere quiete plenaria et honorifice in unam liberam baroniam cum omnimodis libertatibus commoditatibus aisiamentis et iustis pertinenciis in omnibus et per omnia ad liberam baroniam spectantibus seu de iure spectare valentibus in futurum quoquo modo et per easdem metas et divisas per quas burgenses de Are predictas terras cum pertinenciis tenere solebant tempore bone memorie domini Alexandri Dei gracia regis Scottorum illustris predecessoris nostri ultimo defuncti Reddendo inde nobis et heredibus nostris dicti burgenses et eorum successores decem libras argenti per annum videlicet centum solidos ad festum Pentecostes et centum solidos ad festum Sancti Martini in hyeme Et faciendo sectam curie coram vicecomite nostro de Are qui pro tempore fuerit ad singula placita tenenda ibidem debitam et consuetam Et inveniendo nobis et heredibus nostris per vices in adventibus nostris et heredum nostrorum apud Are per tres dies et noctes litorium pro aula nostra et camera et focale pro aula nostra camera et coquina sumptibus suis pro omni alio servicio consuetudine seculari exaccione seu demanda Concessimus eciam eisdem burgensibus et eorum successoribus quod homines sui predictas terras inhabitantes liberi sint et quieti inperpetuum de omnimodis prisis talliagiis cariagiis et contribucionibus quibuscunque et quod non solvant nisi cum predictis burgensibus quando ipsi vel eorum successores per nos vel heredes nostros cum aliis burgensibus regni nostri ad huiusmodi prisas talliagia carriagia et contribuciones fuerint onerati Et quod non transeant ad aliquem exercitum nostrum vel heredum nostrorum nisi cum dicti burgenses cum aliis burgensibus regni nostri ad exercitum transituri per nos vel heredes nostros fuerint sum moniti Preterea concedimus et hac presenti carta nostra confirmamus dominicis burgensibus nostris predicti burgi de Are quod ipsi et eorum successores habeant teneant et possideant gildam suam mercatoriam cum omnimodis libertatibus commoditatibus et articulis ad gildam de iure pertinentibus adeo libere et quiete plenaria et honeste sicut aliqui burgenses infra regnum nostrum gildam suam liberius plenius aut honestius habent tenent seu possident In cuius rei testimonium presenti carte nostre sigillum nostrum fecimus apponi Testibus Bernardo abbate de Aberbrothoc cancellario nostro Duncano comite de Fyfe Patricio de Dunbar comite Marchie Waltero senescallo Scocie Jacobo domino de Duglas et Gilberto de Haia constabulario nostro militibus apud Dunfermelyn vicesimo die Januarii anno regni nostri octavo decimo