Charter Document - 07570002
| Charter Number: | 07570002 |
|---|---|
| Cartulary Title: | Munimenta Fratrum Predicatorum de Are; Charters of the Friars Preachers of Ayr |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1266 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Clemens episcopus servus servorum Dei dilectis filiis magistro et Fratribus ordinis Predicatorum salutem et apostolicam benedictionem Obtentu divini nominis cuius cultui sub sacre nostre religionis observancia studetis mente devotissima deservire votis vestris libenter annuimus et peticiones vestras in hiis que digne deposcitis favorabiliter exaudimus Ex parte siquidem vestra fuit propositum coram nobis quod nonnulli prelati clerici et laici in diversis mundi partibus constituti asserentes vos fore mortuos nec valentes proprium possidere vos occasione huiusmodi a quibuslibet successionibus excludere moliuntur Quare pro parte vestra fuit a nobis humiliter postulatum ut ne contingat vos propter huiusmodi presumpcionem talium aliquod incurrere nocumentum congruum super hoc remedium adhibere paterna diligencia curaremus Nos itaque vestris supplicacionibus benignius annuentes auctoritate apostolica declaravimus quod vos in temporalibus bonis in quibus succederetis in seculo existentes licite potestis succedere et bonorum ipsorum possessionem apprehendere ac vendere libere bona ipsa eorumque precium in utilitatem vestram convertere prout vobis melius videbitur expedire Universas autem interdicti suspensionis et excommunicacionis sentencias quas contra presentis declaracionis tenorem per quemcunque ferri contigerit decernimus irritas et inanes Nulli ergo omnino hominum liceat hanc paginam nostre declaracionis et constitucionis infringere vel ei ausu temerario contraire Si quis autem hoc attemptare presumpserit indignacionem omnipotentis Dei et beatorum Petri et Pauli apostolorum eius se noverit incursurum Datum Perusii ii Idus Februarii pontificatus nostri anno primo []