Charter Document - 07550110

Hec est finalis concordia facta apud Banevy in Gouery die mercurij proximo ante festum sancti Dunstani archiepiscopi ac postmodum in curia vicecomitatus de Perth tenta die martis proximo post festum sancti Augustini Anglorum apostoli apud Perth anno gratie Millesimo trecentesimo vicesimo quinto concorditer firmata super quadam controversia mota inter dominum Henricum de Maule militem dominum de Panemor et capitalem dominum terrarum de Banevy et Balrothery cum pertinentiis ex parte una et Johannem de Glasreth tenentem suum de dictis terris ex altera super jure et proprietate dicte terre de Balrothry videlicet quod dictus dominus Henricus se posuisset in possessionem dicte terre de Balrothery post mortem quondam domine Ethani de Vallibus que dictam terram dum vixit tenuit in dotem Idem dominus Henricus recognovit expresse pro se et heredibus suis jus et proprietatem dicte terre de Balrothery cum pertinentijs esse dicti Johannis de Glasreth tenentis sui prout carte et munimenta dicti Johannis tam ab ipso domino Henrico quam a predecessoribus suis eidem Johanni et predecessoribus suis inde facta et eidem domino Henrico ostensa plenius testantur Recognovit eciam quod in dictis terris de Banevy et de Balrothery cum pertinentiis nihil aliud sibi et heredibus suis per dictum Johannem heredes suos vel assignatos suos debetur nisi tantum fidelitas et sex denarii per annum nomine albe firme de quibus quidem fidelitate et alba firma usque in diem presentis concordie sibi extitit satisfactum Remisit etiam et quietum clamavit pro se et heredibus suis et suis assignatis quibuscunque predicto Johanni et heredibus suis et suis assignatis omnimodam actionem que sibi competebat vel competere potuit super jure proprietate seu possessione dictarum terrarum de Banevy et de Balrothery que [habuerit] initium sive exordium ante diem presentis concordie ita quod non liceat eidem domino Henrico vel heredibus suis aut suis assignatis quibuscunque dictum Johannem heredes suos vel suos assignatos contra formam dictarum terrarum cartarum et munimentorum aliqualiter inquietare seu vexare in perpetuum Et quia constabat eidem de jure quod post mortem tenentis in dotem possessio reverti debeat ad proprietatem ideo dictus dominus Henricus possessionem quam sic adeptus est de dicta terra de Balrothery dicto Johanni tanquam feodum et proprietatem habenti totaliter liberavit promisit etiam pro se et heredibus suis et suis assignatis ac se firmiter obligavit dictum Johannem et heredes suos et suos assignatos de wardis relevijs sectis curie maritagijs auxilijs forinsecis servicijs et quibuscunque alijs oneribus dictas terras de Banevy et de Balrothery contingentibus erga dominum Regem et quoscunque alios de cetero acquietare prout ex tenore dictarum cartarum et munimentorum tenetur Dictus vero Johannes pro se heredibus suis et executoribus aut successoribus quibuscunque remisit omnino et quietum clamavit predicto domino Henrico et heredibus suis omnimodam actionem que sibi competere potuit aut competere poterit in futurum de quibuscunque obligationibus seu contractibus factis seu initis tam inter ipsos dominum Henricum et Johannem quam predecessores suos de quibuscunque debitis usque in diem hujus concordie per quascunque literas obligatoriis quascunque summas pecunie vel aliorum bonorum continentes ita quod non liceat eidem Johanni heredibus suis vel suis executoribus dictum dominum Henricum heredes vel executores suos super dictis obligationibus seu contractibus aliqualiter de cetero inquietare seu vexare in perpetuum Et in signum dicte remissionis et quiete clamationis dictus Johannes liberavit eidem Henrico tot literas obligatoriis quondam domini Willelmi de Maule patris dicti domini Henrici quasdam summas pecunie et aliorum bonorum continentes promittens et recognoscens quod si contigerit alias quascunque literas obligatoriis dicti domini Henrici aut predecessorum suorum dicto Johanni aut predecessoribus suis factas quascunque summas pecunie continentes in posterum inveniri quarum date presentem concordiam precesserunt pro nullis habeantur ac nullum robur optineant firmitatis Hoc tamen intellecto quod per presentem remissionem et quietam clamationem non intendit idem Johannes prejudicare obligationibus sive contractibus qui nascuntur ex cartis et munimentis que et quos idem Johannes habet de feodo suo predicto de Banevy et de Balrothery qui potius in suo robore permaneant in futurum et si contingat dictum dominum Henricum vel heredes suos aut aliquem alium nomine suo vel heredum suorum contra presentem concordiam in aliquo articulo venire aut ipsum Johannem heredes suos vel assignatos super jure proprietate vel possessione dictarum terrarum de Banevy et de Balrothery cum pertinentiis contra tenorem dictarum cartarum et munimentorum aliqualiter vexare seu inquietare quod absit idem dominus Henricus obligat se et heredes suos et suos assignatos quoscunque ad persolvendum eidem Johanni heredibus suis vel suis assignatis quadraginta libras sterlingorum nomine dampnorum et interesse antequam idem Johannes heredes sui vel sui assignati predicto domino Henrico heredibus suis aut alicui nomine suo vel heredum suorum in aliqua petitione teneantur respondere presenti concordia in suo robore nihilominus duratura Si vero contingat dictum Johannem heredes suos vel suos executores contra predictum dominum Henricum heredes suos vel suos executores super aliquibus obligationibus seu contractibus superius renunciatis aliqualiter movere questionem idem Johannes obligat se heredes et executores suos ad persolvendum eidem Henrico heredibus suis vel suis executoribus quadraginta libras sterlingorum nomine dampnorum et interesse ante cujuslibet litis ingressum et antequam in aliqua petitione teneantur respondere presenti concordia ut predictum est in suo robore nihilominus duratura Et quod dicta summa quadraginta librarum tociens a parte delinquencie convictata [solvetur] quotiens partem illam contra tenorem seu formam hujus concordie aliqualiter contigerit contraire Et ad omnia premissa et singula premissorum sine fraude seu contradictione ex utraque parte fideliter observanda dicte partes tactis sacrosanctis Evangelijs juramentum prestiterunt corporale In quorum omnium et singulorum premissorum testimonium atque fidem utraque pars presens scriptum cirographatum sigillo suo alternatim sigillavit et sigillis dominorum Johannis de Inchmartyn tunc vicecomitis de Perth Gilberti de Haya constabularij Scotie Alexandri de Lambirtoun et Willelmi de Dunolmia militum signari procuravit presentibus predictis et multis alijs