Charter Document - 07550089
| Charter Number: | 07550089 |
|---|---|
| Cartulary Title: | Registrum de Panmure |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1235 - 1238 |
| Date type: | Assigned |
| Resource Link(s): |
People of Medieval Scotland |
Charter:
Omnibus sancte matris ecclesie filijs presens scriptum visuris vel audituris Willelmus permissione divina ecclesie sancti Andree apostoli minister humilis eternam in Domino salutem Noveritis quod cum nobis de facultatibus vicarie ecclesie de Linlithchu plenius constaret per viros fide dignos qui eam de mandato nostro estimaverunt taliter de ipsa duximus disponendum videlicet Quod omnes decime negociationis burgensium et aliorum negociatorum et conductivum et decime ortorum ceragia oblaciones obvenciones tam de vivis quam de mortuis exceptis vivis animalibus cum corporibus defunctorum ecclesie legatis decime feni lini casei buteri purcellorum auccarum gallinarum cum domo juxta ecclesiam sitam ad residendum in ea in usus et sustentacionem vicarij cedant Quare volumus et episcopali auctoritate statuimus ut vicarij qui pro tempore fuerint in ecclesia de Linlithchu instituendi supradictis porcionibus sint contenti qui nobis et successoribus nostris de episcopalibus respondebunt omnes uero terre decime et omnia alia bona quocumque modo ad supradictam ecclesiam de Linlithchu de jure spectancia que superius specialiter non expressimus in proprios usus canonicorum sancti Andree in perpetuum convertantur Et ut hec nostra ordinacio robur perpetue firmitatis obtineat presens scriptum sigilli nostri apposicione duximus roborandum Testibus Magistro Laurencio archidiacono sancti Andree Domino Willelmo archidiacono Laodonie Magistro Alexandro de sancto Martino Magistro Johanne de Mellento Magistro Duncano Roberto de Metphen et Roberto de Liston capellanis nostris Ricardo de Kelchou Willelmo de Inverkethin Johanne de Maulia et Baldwino clericis nostris et multis alijs