Charter Document - 07530018
| Charter Number: | 07530018 |
|---|---|
| Cartulary Title: | Chronicon de Lanercost, 1201-1346 |
| Charter Language: | Latin |
| Charter Origin: | Royal |
| Charter Type(s): | Request |
| Date: | 1279 |
| Date type: | Assigned |
| Resource Link(s): |
People of Medieval Scotland |
Charter:
Magnifico principi domino et avunculo suo precordialissimos domino Edwardo Dei gratia illustri regi Anglie domino Hybernie et duci Aquitanie suus si placet nepos Alexander domini regis Scottorum primo genitus salutem cum omni honore et felices ad vota successus De statu vestro domine mee regine sponse vestre et liberorum vestrorum utinam semper prospero et jocundo bonos rumores intimo cordis et mentis affectu scire potius quam audire cupiens incessanter dominationi vestre ea affectione qua possum attentissime supplico quatenus statum vestrum et eorum utinam semper validum et robustum mihi vestro dignemini ad ampliorem animi mei recreationem frequentius significare attendentes pro firmissimo si placet quod intima cordis mei toties in gaudio renovantur quoties de vobis et vestris mihi felicia nunciantur Ceterum pro domino Ingerramo de Humfrayvyle pro quo dominus pater meus celsitudinem vestram sicut intellexi duxit exorare dominationi vestre reverende precum instantia qua possum affectuosissime supplico quatenus justas petitiones quas ipse serenitati vestre facturus est pro terris que fuerunt quondam domini Roberti de Humfraiville patris sui benignis auribus exaudire dignemini pro meis precibus et amore Tantum inde si placet facere volentes quod ipse de meo letari possit interventu per quod mea parvitas ad grates quas potest dominationi vestre per amande merito teneatur Et quia spero firmiter serenitatis vestre benevolentiam velle audire ac scire de me et de germanis meis jocundos rumores vestri gratia dominationi vestre duxi significandum me et ipsos his diebus Domino annuente optata perfrui sospitate Quia proprium sigillum non habeo sigillum domini Willelmi de Sancto Claro Custodis mei feci presentibus apponi Valeat dominatio vestra continue de bono in melius