Charter Document - 07530008
| Charter Number: | 07530008 |
|---|---|
| Cartulary Title: | Chronicon de Lanercost, 1201-1346 |
| Charter Language: | Latin |
| Charter Origin: | Lay |
| Charter Type(s): | Request |
| Date: | 1224 |
| Date type: | Assigned |
| Resource Link(s): |
|
Charter:
Carissimo amico suo domino Huberto de Burgo Justiciario Anglie Willelmus Longespee comes Sarum salutem et dilectionis plenitudinem Noverit dilectio vestra quod dominus Johannes Marescallus nobis per litteras suas mandavit quod cum misisset litteras domini regis domino Falkasio de Brealte pro bosco suo de Nortone et terris suis in ballio sua habendis et in pace possidendis secundum quod ratio exigit idem Falkasius ad literas domini regis respondit quod si ei misisset triginta paria literarum domini regis pacem utique non haberet de predicto bosco nec de aliis rebus suis in ballio sua Et vocavit ipsum Johannem coram serviente suo quem ad eum miserat et omnes naturales homines Anglie proditores dicens etiam quod nos omnes naturales homines Anglie guerram desideramus et volumus et quod ipse tantam guerram nobis inveniet quod tota Anglie satis stricta nobis erit Dum enim precepit servienti dicti Johannis Marescalli quod ista verba domino suo narraret et quod dominus suus nobis et aliis talia propalaret Idem autem Falkasius ballivum dicti Johannis Marescalli de Nortone capere fecit et adhuc imprisonatum detinet apud Norhantone nec vult ipsum deliberare nisi prius ei inveniret salvos plegios quod ei reddet omnes consuetudines et demandas indebitas quas a dicta terra de Nortone exegit averia etiam predicti Johannis de hundredo suo capere fecit et adhuc detinet mala et dedecus ei inferens et adhuc pejora promittens Dilectionem igitur vestram affectuose rogamus quatenus super talibus excessibus festinum consilium apponere velitis Valete