Charter Document - 07530004
| Charter Number: | 07530004 |
|---|---|
| Cartulary Title: | Chronicon de Lanercost, 1201-1346 |
| Charter Language: | Latin |
| Charter Origin: | Religious |
| Charter Type(s): | Acknowledgment |
| Date: | 1223 |
| Date type: | Assigned |
| Resource Link(s): |
|
Charter:
Venerabili domino et patri in Christo carissimo Pandulfo Dei gratia Norwicensi electo domini pape Camerario et Apostolice sedis legato Falkacius de Breaute salutem et debitam cum devotione reverentiam Audivi quod quedam gentes de manerio domini regis scilicet de Beyforde et Esendene hac die Mercurii proxima post octavas Clausum pasche ad vestram accesserunt presentiam de me et meis querimonias proponentes infinitas Unde multum admiror cum multotiens eas convocavi coram me exigens si aliquid eis fieret in contrarium a ballivis meis sed nihil super hujusmodi mihi intimaverant cum custos eorum et ballivus ex parte domini regis sim superior Propter quod mihi videtur quod malitiose ita conquerendo in me et meos insurrexerunt Qua propter vestre supplico excellentie quatenus diligenter velitis inquiri si gentes prenominate in querimoniis suis fuerint transgresse vel ballivi mei eisdem fuerint injuriati Pro certo scientes quod ballivi mei ut audivi nullam actionem penes ipsas habent preter quod gentes jam dicte sibi attraxerunt de bosco domini regis et sua voluntate assartaverunt que quidem assarta ballivi me exigunt in manum domini regis revertendo cum inde nullum habeant warentum a domino rege vel alio Valete