Charter Document - 07530001
| Charter Number: | 07530001 |
|---|---|
| Cartulary Title: | Chronicon de Lanercost, 1201-1346 |
| Charter Language: | Latin |
| Charter Origin: | Religious |
| Charter Type(s): | Acknowledgment |
| Date: | 1220 |
| Date type: | Assigned |
| Resource Link(s): |
|
Charter:
Ricardus Dei gratia Dunelmensis episcopus domini regis Cancellarius charissimo amico domino Huberto de Burgo Justiciario salutem et sinceram in Domino dilectionem Sciatis quod dominus Robertus de Ros moram facit in partibus borealibus exspectans nobiscum adventum regis Scottorum ut intersit conductui suo secundum quod ei per literas domini regis fuerat mandatum Et quia habet diem in curia domini regis coram Justiciariis domini regis de Banco versus Willelmum de Malefoveres petentem de placito terre in Rossmanthorpe a festo Sancte Trinitatis in unum mensem nec ad huc fecit aliquem attornatum nec potest ad curiam personaliter accedere et conductum regi Scottorum prestare nec volumus sustinere quod ad curiam accederet ne rex Scottorum conductum posset causari vos rogamus quatenus faciatis ei habere litteras domini regis directas Justiciariis de Banco de prorogando predicto die donec peracto prefato conductu ad curiam possit personaliter accedere Valete