Charter Document - 07510269

Alexander episcopus servus servorum Dei dilectis filiis Everardo abbati monasterii sancte Marie de Holmcoltram ejusdemque fratribus tam presentibus quam futuris regularem vitam professis inperpetuum Religiosam vitam eligentibus apostolicum convenit adesse presidium ne cujuslibet temeritatis incursus aut eos a proposito revocet aut robur quod absit sancte religionis infringat Ea propter dilecti in Domino filii vestris justis postulationibus annuimus et prefatum monasterium beate Dei genetricis semperque virginis Marie et quo divino estis mancipati obsequio sub beati Petri et nostra protectione suscepimus et presentis scripti privilegio communimus In primis siquidem statuentes ut ordo monasticus qui secundum Dominum et beati Benedicti regulam et institutionem Cisterciensium fratrum in eodem loco institutus esse dinoscitur perpetuis ibidem temporibus inviolabiliter observetur Preterea quascumque possessiones quecunque bona idem monasterium in presentiarum juste et canonice possidet aut in futurum concessione pontificum largicione regum vel principum oblatione fidelium seu aliis modis fidelibus prestante Domino poterit adipisci firma vobis vestrisque successoribus et illibata permaneant In quibus hec propriis duximus exprimenda vocabulis Locum ipsum in quo prefatum monasterium situm est cum omnibus pertinentiis suis grangiam veterem cum omnibus appendiciis suis grangiam de Ternis cum omnibus appendiciis suis grangiam de Maxburgh cum omnibus appendiciis suis grangiam de Rabi cum omnibus appendiciis suis grangiam de Semeburn cum omnibus appendiciis suis quicquid habetis infra insulam de Holm per rectas divisas suas sicut fuit foresta tempore Henrici regis et Radulphi comitis Cestrie Extra insulam de Holme grangiam in Galwidia que dicitur Kirkwyni cum omnibus aysiamentis nemoris a portu Hur usque ad Povesterbened et salinum in loco idoneo sicut in carta Uctredi filii Freser continetur grangiam de Millebronna per rectas divisas suas cum omnibus pertinentiis suis sicut in authentico scripto Gilberti continetur terram de Chelton cum pastura et omnibus aliis pertinentiis sicut in autentico scripto Gospatricii filii Ormi continetur In Hibernia quicquid comes Ricardus et Hugo de Lacy et alii nobiles pietatis intuitu vobis et domui vestre contulerunt nihilominus vobis auctoritate apostolica confirmamus Liceatque vobis clericos vel laicos e seculo fugientes liberos et absolutos ad conversionem recipere et in vestro monasterio absque contradictione aliqua retinere Prohibemus insuper ut nulli fratrum vestrorum post factam in loco vestro professionem fas sit de eodem loco absque licentia magistri sui discedere discedentem vero sine communi literarum vestrarum cautione nullus audeat retinere Sane laborum vestrorum quos propriis manibus aut sumptibus colitis sive de incrementis vestrorum animalium nullus omnino a vobis decimas presumat exigere Paci quoque et tranquillitati vestre paterna sollicitudine providere volentes auctoritate apostolica prohibemus ut infra ambitum monasterii vestri seu grangiarum vestrarum nullus violentiam vel rapinam sive furtum committere aut ignem apponere seu hominem capere vel interficere audeat Statuimus etiam ne episcopi vel alia persona secularis seu alterius ordinis regularem et canonicam abbatis vestri electionem unquam impediat nec de deponendo eo qui pro tempore sublatus fuerit contra statuta Cisterciensis ordinis et auctoritatem privilegiorum vestrorum se nullatenus intromittat Preterea si episcopus in cujus parochia domus vestra fundata est tertio cum humilitate et devotione sicut convenit requisitus abbatem vestrum cum substitutus fuerit benedicere forte noluerit eidem abbati liceat proprios novicios benedicere et alia que ad officium illud pertinent exercere donec ipse duritiam suam recogitet et benedicendum abbatem benedicere non recuset Decernimus ergo ut nulli omnino hominum liceat prefatum monasterium temere perturbare aut ejus possessiones auferre vel ablatas temere minuere aut quibuslibet vexationibus fatigare sed omnia integra et illibata serventur eorum pro quorum gubernatione et sustentatione concessa sunt usibus omnimodis profutura salva sedis apostolice auctoritate Si qua vero in futurum ecclesiastica secularisve persona hanc nostre constitucionis paginam sciens contra eam temere venire temptaverit secundo terciove commonita nisi reatum suum digna satisfactione correxerit potestatis honorisque sui dignitate careat reamque se divino judicio existere de perpetrata iniquitate cognoscat et a sanctissimo corpore et sanguine Dei et Domini redemptoris nostri Jesu Christi aliena fiat atque in extremo examine districte ulcioni subjaceat Cunctis autem eidem loco sua jura servantibus sit pax Domini nostri Jesu Christi quatenus et fructum bone actionis percipiant et apud districtum judicem premia eterne pacis inveniant Amen Data anno gratie MCLXXV pontificatus domini Alexandri pape iii anno xvii