Charter Document - 07480032
| Charter Number: | 07480032 |
|---|---|
| Cartulary Title: | Charters of the Abbey of Inchcolm |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1320 |
| Date type: | Internal, A.D., Feast |
| Resource Link(s): |
|
Charter:
Omnibus hoc scriptum visuris vel audituris Ricardus de Kirkawde Rector ecclesie de Maleville Sancti Andree dioecesis Salutem in Domino Cum inter me actorem ex parte una et Religiosos viros Dominos Abbatem et conventum insule Sancti Columbe Rectores ecclesie de Fithkil reos ex altera Super capella beate Marie infra cimiterium dicte ecclesie de Fithkil sita coram venerabili patre Domino Willelmo Dei gratia Dunkeldensi episcopo materia dissensionis esset aliquamdiu exorta tandem iurisperitorum consilio informatus consideravi ipsam capellam ad dictam ecclesiam de Fithkil debere pertinere de iure communi ab impetitione et vexatione dictorum religiosorum omnino desistere volens totum ius si quid in eadem capella habui mere et pure resignavi et resigno per presentes et eisdem religiosis quietum clamavi ac tenore presentium quietum clamo Renuncians in hoc facto omnis iuris prosecutioni inperpetuum Et iuravi in verbo Dei apertis Sacrosanctis evangeliis me prefatas resignationem quiete clamationem et renunciationem meo perpetuo servaturum illisas et quod nullum ius in dicta capella de cetero vendicabo nec pretactos religiosos super premissis quoquomodo vexare aut inquietare presumam Et he omnibus quorum interest tenore presentium significo In cuius Rei testimonium Sigillum meum una cum sigillo officialitatis curie Dunkeldensis ad meam diligentem procurationem et supplicationem presentibus est appensum Datum et actum in Capella Grangie de Beupre die Sabbati in festo Sanctarum Perpetue et Felicitatis Anno Domini Millesimo trecentesimo Vicesimo Presentibus officiali curie Dunkeldensis Domino Ricardo tunc capellano parochie de Abirdoure Willelmo Godarde Thome Fabro de Abirdoure et multis aliis