Charter Document - 07480030
| Charter Number: | 07480030 |
|---|---|
| Cartulary Title: | Charters of the Abbey of Inchcolm |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1277 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Anno gratie Millesimo Ducentesimo septuagesimo Septimo Ad Pentecosten facta est hec conventio inter Dominum Willelmum Dei gratia Abbatem de Insula Sancti Columbe et eiusdem loci conventum ex parte una et Thomam de Sancto Philiberto ex altera videlicet quod dictus Thomas et heredes sui dabunt singulis annis predictis Abbati et conventui et successoribus suis inperpetuum pro multura terre de Cullelaw et aliarum terrarum in tenemento de Abirdoure quas habuit ex dono Ricardi Sward die quo ista compositio facta fuit Quatuordecim solidos argenti ad duos anni terminos videlicet septem solidos ad festum Sancti Martini in hieme Et septem solidos ad Penthecosten Recipiendos sine aliqua dilatione per manus illorum qui dictam terram pro tempore tenuerint Et si contigerit quod dictos denarios infra octavas predictorum terminorum non soluerint predictus Thomas pro se et heredibus suis concessit predictis Abbati et conventui et eorum ballivis licentiam et potestatem nanos quoscunque poterint et voluerint pro voluntate sua in dictis terris capere nulli omnino per aliquam legem replegiandos vel liberandos Donec de dictorum denariorum solutione dictis abbati et conventui plene fuerit satisfactum Pro hac autem conventione et concessione predicti Abbas et conventus pro se et successoribus suis inperpetuum quietum clamaverunt prefato Thome et heredibus suis omnimodam multuram reparationem stagni et molendini de Aberdoure et omnia alia servicia que spectant ad communitatem predicti molendini ratione predictarum terrarum Ut autem ista conventio inter partes inviolabiliter observetur dicti Abbas et conventus pro se et successoribus suis et dictus Thomas pro se et heredibus suis subiecerunt se iurisdictioni et cohercioni domini Episcopi Dunkeldensis vel eius Archidiaconi qui pro tempore fuerint ut ipsi vel eorum alter qui super hoc fuerit requisitus sine strepitu iudiciali et cause cognitione quamcumque partem contra predictam conventionem resilire presumentem possint compellere Renunciantes in omnibus omni exceptioni cavillacioni dolo et fraudi et maxime Regie prohibitioni et cuiuslibet fori et omnibus remediis impetratis et impetrandis et omnibus aliis que iis et suis posteris poterunt compescere ad defensionem In cuius rei testimonium presenti scripto in modum chirographi confecto parti penes dictos Abbatem et conventum residenti Sigillum dicti Thome de Sancto Philiberto est appensum Et parti penes dictum Thomam remanenti Sigillum commune capituli de Insula est appositum Hiis testibus Domino Radulpho Abbate de Dunfermeline Domino David de Louhore Domino Radulpho de Laschelis Duncano de Crambeth Waltero de Strath[enry] clerico Simone de Oroe Hugone de Louhore Willelmo Fessecart et multis aliis