Charter Document - 07470051

Adrianus Episcopus servus servorum Dei dilectis filiis Roberto priori ecclesie Beati Andree apostoli in Scotia ejusque fratribus tam presentibus quam futuris regularem vitam professis in perpetuum Quotiens illud a nobis petitur quod religioni et honestati convenire dinoscitur animo nos decet libenti concedere et petentium desideriis congruum impetrari consensum Ea propter dilecti in Domino filii vestris justis postulationibus clementer annuimus et prefatam ecclesiam in qua divino mancipati estis obsequio ad exemplar predecessoris nostri sancte recordationis Eugenii Pape sub Beati Petri et nostra protectione suscipimus et presentis scripti privilegio communimus Statuentes ut ordo canonicus secundum Beati Augustini regulam qui per gratiam Dei consilio et auxilio venerabilis fratris nostri Roberti episcopi vestri et tuo dilecte in Domino fili Roberte prior labore et studio in eadem ecclesia noscitur institutus perpetuis ibidem temporibus inviolabiliter conservetur preterea quascunque possessiones quecunque bona eadem ecclesia in presentiarum juste et canonice possidet aut in futurum concessione pontificum largitione regum vel principum oblatione fidelium seu aliis justis modis prestante Domino poterit adipisci firma vobis vestrisque successoribus et illibata permaneant In quibus hec propriis duximus exprimenda vocabulis Barrimunid Struuithin [] Obeunte vero fratre nostro Roberto episcopo vestro nullus in ecclesia Sancti Andree que sedes episcopalis est aliqua surreptionis astutia seu violentia proponatur sed quem vestro communi consensu vel fratrum ecclesie vestre pars consilii sanioris secundum canonice provideritis eligendum Statuimus etiam ut decedentibus Keledeis loco eorum regulares canonici auctore Domino subrogentur Decrevimus ergo ut nulli omnino hominum liceat supradictam ecclesiam temere perturbare aut ejus possessiones auferre vel ablatas retinere minuere seu quibuslibet vexationibus fatigare sed illibata omnia et integra conserventur eorum pro quorum gubernatione et sustentatione concessa sunt usibus omnimodis profutura Salva nimirum apostolice sedis auctoritate et episcopi Sancti Andree canonica justicia Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi presumptionem suam congrua satisfactione correxerit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore ac sanguine Dei et Domini redemptoris nostri Jhesu Christi aliena fiat atque in extremo examine districte ultioni subjaceat Cunctis autem eidem loco sua jura servantibus sit pax Domini nostri Jhesu Christi quatinus et hic fructum bone actionis percipiant et apud districtum judicem premia eterne pacis inveniant Amen Amen Amen Oculi mei semper ad Dominum Sanctus Petrus Sanctus Paulus Adrianus Papa iiii Ego Adrianus catholice ecclesie episcopus subscripsi Ego Jamarus Tusculensis episcopus subscripsi Ego Centius Portuensis et Sancte Rufine episcopus subscripsi Ego Gregorius Sabinensis episcopus subscripsi Ego Guido presbiter cardinalis tituli Sancti Grisogoni subscripsi Ego Octovianus presbiter cardinalis tituli Sancte Cecilie subscripsi Ego Henricus presbiter cardinalis tituli Sanctorum Nerei et Achillei subscripsi Data Narn per manum Rolandi Sancte Romane ecclesie presbiter cardinalis et cancellarii v Idus Augusti Indictione iiij Incarnationis dominice anno MCLVI pontificatus vero domini Adriani pape iiii anno secundo