Charter Document - 07470048

Eugenius Episcopus seruus seruorum Dei dilectis filiis Roberto Priori Ecclesie beati Andree Apostoli in Scotia eiusque fratribus tam presentibus quam futuris regularem uitam professis in perpetuum Ad hoc uniuersalis Ecclesie cura nobis a Prouisore omnium bonorum Deo commissa est ut religiosas diligamus personas et bene placentem Deo religionem studeamus modis omnibus propagare Nec enim Deo gratus aliquando famulatus impenditur nisi ex caritatis radice procedens a puritate religionis fuerit conseruatus Ea propter dilecti in Domino filii uestris iustis postulationibus clementer annuimus et prefatam Ecclesiam in qua Diuino mancipati estis obsequio sub beati Petri et nostra protectione suscipimus et presentis scripti priuilegio communimus statuentes ut Ordo Canonicus secundum beati Augustini regulam qui per Dei gratiam consilio et auxilio uenerabilis fratris nostri Roberti Episcopi nostri et tuo dilecte in Domino fili Roberto Prior labore et studio in eadem Ecclesia noscitur institutus perpetuis ibidem temporibus inuiolabiliter conseruetur Preterea quascumque possessiones quecumque bona eadem Ecclesia in presentiarum iuste et canonice possidet aut in futurum concessione Pontificum largicione Regum uel principum oblatione fidelium seu aliis iustis modis Deo propitio poterit adipisci firma uobis uestrisque successoribus et illibata permaneant Libertates seu immunitates ab Episcopis siue Regibus rationabili deuotione Ecclesie uestre concessas auctoritate uobis Apostolica confirmamus Obeunte uero fratre nostro Roberto Episcopo uestro nullus in Ecclesia Sancti Andree que sedes Episcopalis est aliqua surreptionis astutia seu uiolentia preponatur sed quem uos communi consensu uel fratrum Ecclesie uestre pars consilii sanioris secundum Dominum canonice prouideritis eligendum Statuimus etiam ut decedentibus Keledeis loco eorum regulares Canonici auctore Domino subrogentur Decrevimus ergo ut nulli omnino hominum liceat prefatam Ecclesiam temere perturbare aut eius possessiones auferre uel ablatas retinere minuere aut quibuslibet uexationibus fatigare sed omnia integra conseruentur eorum pro quorum gubernatione et sustentatione concessa sunt usibus omnimodis profutura salua sedis Apostolice auctoritate et Episcopi Sancti Andree canonica reuerentia Si qua ergo in futurum ecclesiastica secularisque persona hanc nostre constitucionis paginam sciens contra eam temere uenire temptauerit secundo tertioue commonita si non satisfactione congrua emendauerit potestatis honorisque sui dignitate careat reamque se Diuino iuditio existere de perpetrata iniquitate cognoscat et a sacratissimo Corpore et Sanguine Domini Redemptoris nostri Iesu Christi aliena fiat atque in extremo examine districte ultioni subiaceat Cunctis autem eidem loco iusta seruantibus sit pax Domini nostri Iesu Christi quatinus et hic fructum bone actionis percipiant et apud districtum Iudicem premia eterne pacis inueniant Amen Amen Amen Fac mecum Domine signum in bonum Sanctus Petrus Sanctus Paulus Eugenius Papa III Ego Eugenius Catholice Ecclesie Episcopus Subscripsi Ego Albericus Ostiensis Episcopus Subscripsi Ego Imarus Tusculanus Episcopus Subscripsi Ego Hubaldus presbiter Cardinalis titulo Sanctorum Johannis et Pauli Subscripsi Ego Gillebertus indignus sacerdos titulo Sancti Marci Subscripsi Ego Hugo presbiter Cardinalis titulo in Lucina Subscripsi Ego Odo diaconus Cardinalis Sancti Georgii ad uelum aureum Subscripsi Ego Johannes Paparo diaconus Cardinalis Sancti Adriani Subscripsi Ego Gregorius Sancti Augusti diaconus Cardinalis Subscripsi Ego Johannes diaconus Cardinalis Sancte Marie Noue Subscripsi Ego Guido diaconus Cardinalis Sancte Marie in porticu Subscripsi Data Altisiodori per manum Guidonis Sancte Romane Ecclesie diaconi Cardinalis et Cancellarii iij kalendas Septembris Indictione x Incarnacionis Dominice anno MCXLVII Pontificatus uero Domini Eugenii iij Pape anno iij