Charter Document - 07415048
| Charter Number: | 07415048 |
|---|---|
| Cartulary Title: | Registrum Episcopatus Moraviensi |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1159 - 1181 |
| Date type: | Assigned |
| Resource Link(s): |
|
Charter:
Alexander servus servorum Dei dilectis filiis decano et capitulo Lincolniensis ecclesie salutem et apostolicam benedictionem Quotiens a viris ecclesiasticis devote requiritur ut eis super hiis que rationabiliter possident apostolice confirmationis suffragium conferamus ad concedenda que postulant faciles inveniri debemus et eorum rationabilibus votis gratuitum impertiri consensum Ea propter dilecti in Domino filii vestris justis postulationibus benigne annuentes libertatem quam bone memorie Robertus quondam Episcopus vester vobis in prebendis vestris et ecclesiis ad communem vestram pertinentibus et subdiaconatum ecclesie vestre et ecclesie de Lechton ad eundem subdiaconatum pertinenti circa tempora sue promotionis concessit et scripto proprio sigillo suo roborato firmavit sicut eam hactenus pacifice habuistis devotioni vestre auctoritate apostolica confirmamus et presentis scripti patrocinio communimus statuentes ut nulli hominum liceat hanc paginam nostre confirmationis infringere vel ei aliquatenus contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum se noverit incursurum Datum Tusculi Idibus Septembris