Charter Document - 07411262

Venerabilibus fratribus Archiepiscopo Colocensi et Batiensi ac [Sezemensi] et Chonadiensi episcopis Sicut dilectus filius Thomas electus et capitulum Waradiense nobis significare curarunt vacante dudum Waradiensi ecclesia per translationem venerabilis fratris nostri Lodomerij archiepiscopi Strygouenensis tunc Wardenensis episcopi ad ecclesiam Strygouenensem iidem dictum Thomam tunc prepositum ecclesie Sancti Mychaelis de Castro Ferreo Jauriensis dioecesis in eorum episcopum canonice et concorditer elegerunt et tibi frater Archiepiscope tunc Colocensi electo et [] loci metropolitano electione hujusmodi presentata illam confirmari petiverunt cum instantia sed venerabilis frater noster Philippus episcopus Firmanus in illis partibus apostolice sedis legatus afferens quod idem Thomas preposituram ipsius ecclesie de Castro Ferreo post generale concilium Lugdonense fuerat assecutus et juxta tenorem constitutionis in ipso concilio edite per felicis recordationis Gregorium papam x predecessorem nostrum ordinem presbiteratus non receperat infra annum propter quod erat inhabilis ad hujusmodi confirmationis beneficium optinendum inhibuisse tibi dicitur ne dictam electionem aliquatenus confirmares Sicque pretextu inhibitionis hujusmodi dicta Waradiensis ecclesia vacationis in commoda compellitur experiri Cum itaque ut asseritur dicta ecclesia de Castro Ferreo non parochialis sed collegiata existat ita quod ad preposituram ipsam se dicta constitutio que tantum de parochialibus ecclesiis et assumptis ad regimen animarum loquitur non extendit pro parte dictorum electi et capituli fuit nobis humiliter supplicatum ut provide super hoc de benignitate sedis apostolice curaremus Nos autem predicte Waradiensi ecclesie ne ulteriori vacationi subjaceat paterna volentes beatitudine providere fraternitati vestre per apostolica scripta mandamus quatinus veris existentibus supradictis tu frater predicte Archiepiscope cum eorum altero si omnes hiis exsequendis ne quiveritis interesse inquisita de modo electionis studiis eligentium ac electi meritis diligentius veritate si dictam electionem inveneritis alias de persona ydonea canonice celebratam auctoritate nostra confirmetis eandem facientes a suis subditis eidem electo reverenciam et obedienciam debitam exhiberi Ac nihilominus prefate Archiepiscope adjunctis tibi duobus vel tribus episcopis gratiam et communionem sedis apostolice optinentibus predicto electo munus consecrationis impendas Alioquin eadem electione rite cassata ex tunc celebranda electio predicte Wardanensis ecclesie ad eos ad quos de jure pertinet devolvatur Datum apud Urbem veterem xiiii Kalendas Julii anno secundo