Charter Document - 07411127

R[obertus] Dei gratia episcopus et decanus Rossensis ecclesie et Prior de Bello loco ejusdem dyoeceseos executores deputati a viro religioso Dei gratia Abbate de Der unico judice a sede apostolica delegato in causa que super terra ecclesie de Keltalargyn vertebatur inter venerabilem patrem Archebaldus Dei gratia Moraviensem episcopum actorem ex una et dominum Willelmum de Fenthon dominum de Beuford in le Hard et Ciciliam sponsam suam reos ex altera dilectis sibi in Christo Decano Christianitatis de Inuernys Rectori ecclesie de Lundechtyn et Vicario de Wardlawe salutem in salutis auctore Cum nos die Mercurii proximo ante festum Sancti Michaelis anno gratie millesimo CCLXX nono ad ecclesiam de Keltalargyn accedentes prefatum Episcopum Moraviensem personaliter ibidem comparentem nomine ecclesie sue in veram et corporalem possessionem dimidie dauache terre ad jus et proprietatem dicte ecclesie de Keltalargyn de jure spectantis et prefato Episcopo nomine ecclesie sue cum edificiis aquis piscariis juribus ac ceteris omnibus pertinentiis ad dictam terram spectantibus per prefatum judicem ex secundo decreto alias finaliter adjudicate prout in actis inde confectis plenius continetur juxta mandatum dicti Judicis immo verius apostolici induximus et ibidem publice denunciando auctoritate apostolica monuimus ne prefatus Willelmus per se vel per alios ab illo tempore in antea prefatum Episcopum quocunque modo impedire presumeret quominus de predicta terra et ejus pertinentiis omnibus et singulis prout sibi visum fuerit expedire libere valeat disponere et ordinare at spretis monitionibus nostris prefatus Willelmus percepta injuste et retenta firma predicte terre de termino Sancti Martini anni gratie supradicti prefatum Episcopum quominus pacifice possessione sibi decreta uti valeat et gaudere hactenus temere presumpsit impedire vobis mandamus conjunctim et divisim in virtute obedientie qua sede apostolice tenemini sub pena majoris excommunicationis in personas vestras ex tunc late si in hoc mandato nostro immo verius apostolico negligentes fueritis vel remissi firmiter injungentes quatenus statim visis literis istis adjunctis vobiscum quibusdam capellanis et aliis fide dignis ad castrum de Beuford personaliter accedentes trinas monitiones videlicet semel secundo et tertio auctoritate nostra immo verius apostolica ibidem faciatis ut prefati Willelmus et Cecilia firma predicta ipsi Episcopo plenius restituta de cetero se vel per per alios eundem Episcopum vel procuratorem suum ad hoc specialiter constitutum impedire non presumant quo minus de predicta terra et ejus pertinentiis ut predictum est libere valeat disponere Et vero si monitionibus vestris contemptis usque ad proximum pascha in sua contumacia perseveraverint ipsos quos ex tunc ab ingressu ecclesie in hiis scriptis suspendimus per totum decanatum de Inuernys et alibi ubicumque visum fuerit expedire pro suspensis hujusmodi denuncietis Et si iterato super premissis legitime moniti ut prius infra diem dominicum post instans festum assensionis Domini a sua rebellione desistere non curaverint ipsos quos tunc propter crescentem contumaciam pena dignos graviori in hiis scriptis excommunicamus per loca supradicta singulis diebus dominicis et festivis pulsatis campanis candelis accensis publice et solempniter denuncietis excommunicatos Sane si adhuc tertio super premissis legitime moniti ut prius animo indurato claves ecclesie vilipendentes ad gremium matris sue infra festum Sancti Petri ad vincula proxime futurum redire non curaverint cum crescente contumacia crescere debet et pena sententiam interdicti quam ex tunc in terras eorum et in omnia loca ubi moram traxerint quam diu ibi steterint in hiis scriptis proferimus tam diebus quam locis et sub eadem solemnitate ut supra dic tum est efficaciter publicetis ab executione mandati nostri immo verius apostolici nullatenus cessantes set omnia superius vobis injuncta sub pena prenominata fideliter exequentes quousque super premissis omnibus ad condignam satisfactionem venientes premissarum sententiarum relaxationem meruerint optinere vel vos super hoc per literas nostras patentes ut ab executione vobis in hac parte demandata desistere debeatis fueritis certiorari Datum apud Kinloss in crastino annunciationis beate Marie anno Domini MCC octogesimo