Charter Document - 07410091
| Charter Number: | 07410091 |
|---|---|
| Cartulary Title: | Registrum Episcopatus Moraviensi |
| Charter Language: | Latin |
| Charter Origin: | Religious |
| Charter Type(s): | Obligation |
| Date: | 1240 |
| Date type: | Internal, A.D., Calendar |
| Resource Link(s): |
People of Medieval Scotland |
Charter:
In nomine Patris et Filii et Spiritus Sancti amen Actum in capitulo canonicorum ecclesie cathedralis de Elgyn anno gratie MCC tricesimo nono Nonis Martii vocatis omnibus qui erant vocandi de consensu capituli consilio et concessione majoris et sanioris partis predicti capituli sicut ex subscriptionibus canonicorum liquet qui predicto capitulo interfuerunt provisum est et ordinatum et statutum ut omnes canonici predicte ecclesie cathedralis de Elgyn tam majores quam minores teneantur residentiam facere in eadem excepto canonico de Fotheruays qui occasione prebende de Fotheruays ad nullam teneatur residentiam Statutum est autem ut decanus pro majore parte anni residere teneatur continue vel interpolate ut precentor can cellarius thesaurarius teneantur residere per dimidium annum continue vel interpolate residere teneantur statutum est etiam ut archidiaconus per xl dies continue vel interpolate residere teneatur et subdecanus succentor canonicus de Croyn et canonicus centum solidorum continue residere teneantur Statutum est etiam ut alii canonici omnes et singuli qui cum integritate prebendarum suarum reditus percipiunt residere teneantur per quartam partem anni continue vel interpolate ita tamen quod in optione eorum fit sic residere vel dare septimam partem omnium proventuum prebendarum suarum ad communem canonicorum ibidem residentium Preterea statutum est ut quilibet habens dignitatem in dicta ecclesia juret post suam installationem quod residebit in dicta ecclesia secundum formam suprascriptam Item statutum est quod quotiens vocandus fuerit aliquis canonicus pro quibuscunque causis vel negotiis ecclesiam predictam vel personam ipsius tangentibus sufficiat ipsum citari in choro et in stallo suo et in prebenda sua vel ipsius procuratori sufficiat denunciare Unde statutum est ut quilibet canonicus absens habeat suum procuratorem in predicta ecclesia cathedrali Ad perpetuam igitur omnium premissorum memoriam et firmitatem et indubitabile testimonium huic scripto apposita sunt sigilla venerabilis patris Andree Moraviensis episcopi et predicti capituli cum subscriptionibus canonicorum usque ad xviii qui tunc fuerunt presentes cum Andree episcopo