Charter Document - 07410084
| Charter Number: | 07410084 |
|---|---|
| Cartulary Title: | Registrum Episcopatus Moraviensi |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1232 - 1237 |
| Date type: | Assigned |
| Resource Link(s): |
People of Medieval Scotland |
Charter:
Omnibus sancte matris ecclesie filiis Andreas permissione divina Moraviensis episcopus et capitulum Sancte Trinitatis de Elgyn eternam in Domino salutem Quoniam sepe contingit in ecclesia nostra ut canonici et confratres nostri ad beneficia uberiora curam animarum habentia vocati perceptione fructuum prebendarum suarum privantur et impedientibus annualibus decedentium ad quorum beneficia intitulatum per annum integrum de fructibus eorundem beneficiorum nichil penitus percipientes egere vel ere alieno onerari contigerit Eodem habito tractatu diligenti et deliberatione de consilio et consensu communi duximus statuendum et in ecclesia nostra firmiter et perpetualiter observandum ut quotienscunque hoc contigerit is qui ad beneficium aliquod vocatus fuerit in quo cedens vel decedens vel ad religionem transiens annuale suum habuerit et optinuerit secundum consuetudines approbatas in ecclesia Scoticana interim omnes fructus prebende sue habeat et integraliter percipiat scilicet donec ejus beneficii fructus ad quod vocatur percipere et de eis disponere libere liceat eidem In premissorum autem firmum et indubitabile testimonium huic scripture apposita sunt sigilla nostra cum fratrum subscriptionibus Ego Andreas episcopus Moraviensis et canonicus subscribo Ego Willelmus cancellarius Moraviensis subscribo Ego Gilbertus canonicus de Dufphus subscribo Ego Willelmus precentor Moraviensis subscribo Ego Walterus subdecanus Moraviensis subscribo Ego Robertus de Duppol subscribo Ego Lambertus succentor ecclesie Moraviensis subscribo Ego Edwardus canonicus de Moy Ego Willelmus Agnus canonicus de Kinguscy Ego Malisius canonicus de Dothol subscribo per procuratorem Ego Archebaldus canonicus de Croyn subscribo