Charter Document - 07410047

Innocentius episcopus servus servorum Dei dilectis filiis Decano et capitulo Moravie salutem et apostolicam benedictionem Justis petentium desideriis dignum est nobis facilem prebere consensum et vota que a tramite rationis non discordant effectu prosequente complere Ea propter dilecti filii in Domino vestris justis postulationibus gratum impertientes assensum personas vestras et ecclesiam in qua estis divino obsequio mancipati cum omnibus bonis que in presentia rationabiliter possidetis aut in futurum justis modis prestante Domino poteritis adipisci sub beati Petri et nostra protectione suscepimus specialiter autem ecclesiam de Eren ecclesiam de Lamanbride ecclesiam de Aluays ecclesiam de Ratheforde ecclesiam de Kynedor ecclesiam de Eskyl ecclesiam Sancti Petri de Strathouen ecclesiam de Urchard ultra Inuernys ecclesiam de Forays ecclesiam de Logynfythenach ecclesiam de Spyni ecclesiam de Rothwan et ecclesiam de Duppol cum omnibus pertinentiis earundem Terras scilicet Fotherueis Lunnyn Duldauy et omnia alia bona vestra sicut ea omnia juste et pacifice possidetis vobis et per vos ecclesie vestre auctoritate apostolica confirmamus et presentis scripti patrocinio communimus Ad petitionem vestram nihilominus concedentes ut octonarius numerus canonicorum et prebendarum per venerabilem fratrem nostrum Bricium episcopum vestrum de assensu vestro in ecclesia vestra provida deliberatione statutus ibidem firmiter observetur nisi excreverint adeo ipsius ecclesie facultates quod pluribus sufficere valeant competenter Nulli ergo omnino hominum liceat hanc paginam nostre protectionis confirmationis et concessionis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Lateran xi Kalendas Januarii pontificatus nostri anno xvii