Charter Document - 07390146
| Charter Number: | 07390146 |
|---|---|
| Cartulary Title: | Liber Sancte Marie de Melros |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1204 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Willelmus Dei gratia rex Scottorum episcopis abbatibus comitibus baronibus justiciis vicecomitibus prepositis ministris et omnibus probis hominibus tocius terre sue clericis et laicis salutem Sciant presentes et futuri quod cum controuersia per multos annos durasset inter domos de Kelchou et de Melros de diuisis inter Melros et Bouldene terram monachorum de Kelchou tandem dominus papa Celestinus per litteras suas mihi significauit et in remissionem peccatorum mihi iniunxit ut facta diligenti inquisicione de diuisis illis quod iustum esset inquirerem [et] partibus assignarem Johannes etiam titulo Sancti Stephani in Celio Monte presbiter cardinalis dum legacione fungeretur in terra mea me instanter inde precatus est et auctoritate sua mihi iniunxit Tandem veni aput Melros anno ab incarnacione Domini MCCIJ in octavis Epiphanie et presentibus multis clericis et laicis cum sermo fieret de diuisis illis Willelmus qui tunc fuit abbas de Melros habito tractatu et consilio per consensum conuentus sui et Osbertus abbas de Kelchou per consensum capituli sui compromiserunt in me et affidauerunt quod starent dicto meo super diuisis illis et quod illud quod ego secundum inquisicionem meam inde dicerem ex utraque parte firmiter et inuiolabiliter tenerent Cumque postea diligentem inquisicionem per probos et antiquos homines patrie inde fecissem pluries in presentiam meam partes conuenire feci Tandem uenerunt ad me apud Selechirche anno ab incarnacione Domini MCCIIIJ die dominica post clausum Pascha et ibi in plena curia sentenciando pronunciaui presentibus clericis et laicis quod terra illa unde controuersia fuit fuit monachorum de Kelcho et esse debuit de iure per diuisas illas per quas monachi de Kelcho asserebant terram illam suam esse scilicet per nemus quod scissum fuit inter domos illas per Regem Dauid auum meum et per superficiem montis in cuius summitate fecit fossas fieri et hoc fuit uerum dictum meum quod inde dixi et de iure dicere debui per testimonium proborum et antiquorum hominum patrie Volui autem ut monachi de Kelcho concederent monachis de Melros inperpetuum duas bouatas terre et duas acras prati et pasturam ad cccc oues que habebant idem monachi de Kelcho in Prenwenesete et hoc eis con cesserunt predicti monachi de Kelcho et hoc modo terminata fuit loquela illa die illo Quare uolo et precipio quatinus diuise predicte sicut prefatum est firmiter et inuiolabiliter futuris temporibus teneantur et ne contencio ulterius super diuisis illis inter predictas domos audiatur Teste []