Charter Document - 07390123
| Charter Number: | 07390123 |
|---|---|
| Cartulary Title: | Liber Sancte Marie de Melros |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1193 - 1195 |
| Date type: | Assigned |
| Resource Link(s): |
People of Medieval Scotland Models of Authority |
Charter:
Willelmus Dei gratia Rex Scott[orum] Episcopis Abbatibus Comitibus Baronibus Justiciis Uicecomitibus Prepositis Ministris et Omnibus probis Hominibus tocius terre sue clericis et laicis Salutem Sciant presentes et futuri nos concessisse et hac carta mea confirmasse Deo et Sancte Marie et ecclesie de Melros et monachis ibidem Deo seruientibus in liberam et quietam et perpetuam elemosinam ecclesiam de Hatstanesden cum terris et decimis et omnibus ad ipsam ecclesiam pertinentibus ad susceptionem et sustentationem pauperum et peregrinorum ad domum de Melros uenientium a Jocelino Glasguensi episcopo per consilium nostrum assignatam De qua ecclesia cum esset inter nos et eundem episcopum controuersia ad quem nostrum donatio ipsius ecclesie pertineret ius nostrum quod in ea habuimus uel habere potuimus eidem episcopo concessimus ad ipsam ecclesiam secundum Deum ordinandam Et ipse episcopus ut prouentus ipsius ecclesie in caritatis operibus expendantur et in bonos usus perpetuo conuertantur ipsam ecclesiam cum omnibus pertinenciis suis pro animabus omnium predecessorum nostrorum et suorum et salute et anima nostra et sua et omnium heredum nostrorum et successorum suorum per consilium et concessionem nostram ad perpetuos usus pauperum et peregrinorum ecclesie et conuentui de Melros pia consideratione contulit et confirmauit Ut autem hoc pium factum et rationabile perpetuam et illibatam habeat firmitatem predictam ecclesiam de Hatstanesden cum omnibus pertinenciis suis Deo et Sancte Marie et ecclesie de Melros in liberam et perpetuam elemosinam ad sanctos usus prenominatos concedimus et hac carta nostra confirmamus Tenendam in perpetuum ita libere Quiete plenaria et honorifice Sicut aliqua parochialis ecclesia in regno nostro liberius Quietius Plenius et Honorificentius ab aliqua conuentuali ecclesia tenetur et possidetur Salua pensione viginti solidorum ecclesie Glasguensi de ipsa ecclesia de Hatstanesd ab ipsis monachis singulis annis persoluenda Sicut carta eiusdem Jocelini Glasguensis episcopi testatur Et ne inter nos uel heredes nostros uel ipsos qui de nobis manerium predictum tenuerint et ipsos monachos aliqua in posterum super pastura predicte uille possit esse controuersia per preceptum nostrum et per considerationem proborum Hominum nostrorum prouisum est quantum predicti monachi in pastura predicte uille habere debeant Scilicet ducentas matrices oues et sex decem boues et quatuor uaccas quo illis in pastura illa perpetuo habendum concessimus et hac carta nostra confirmauimus Firmiter prohibentes nequis eis super hoc iniuriam aut uexationem aliquam inferat Super nostram plenarium foris facturam Testibus Jocelino Glasguensi episcopo Ricardo Episcopo Morauiensi Erkenbaldo Abbate de Dunfermelin Comite Dauid fratre nostro Hugone Cancellario nostro Willelmo de Lind Justicia Philippo de Valoniis Dauid de Lindes Hugone de Normanuill Waltero de Berkel camerario nostro Herberto de Camera Apud Melros